Уопсастыба

Дмитрий Спартакович сатабыллаах, олус эппиэтинэстээх салайааччы буоларын таһынан Амма айылҕатын харыстааһыны турууласпыт дьонтон биирдэстэрэ буоларын кинини кытта үлэлээн, алтыһан ааспыт дьон, дьиэ кэргэнэ истиҥник ахтан аастылар. Кини араас харгыстартан толлубакка, Василий Федоровы, Дмитрий Саввиновы, Ольга Иванова-Сидоркевиһы, Баһылай Харысхалы уо.д.а. уопсастыбаннай диэйэтэллэрин кытары төрөөбүт дойдута чөл хааларын туһугар киэҥ өрүттээх үлэни ыыппыт улахан өҥөлөөх.

– Дмитрий Спартакович салайар үлэҕэ олорор кэмигэр турууласпыт икки боппуруоһа – Амма айылҕатын харыстааһын, чуолаан Амма баһыгар мас кэрдиитэ, Чыамайыкыга алмаас хостооһуна уонна оройуон сири тыырыы, улуус кыраныыссатын чуолкайдааһын билигин эмиэ күөрэйэн таҕыстылар. «Дойдутун олус таптыыра. Ол иһин эккирэтиһииттэн да, дуоһунаһын сүтэрэриттэн да куттаммакка, Амма өрүһү харыстааһыҥҥа аан маҥнайгынан туруммута. Амма уутун Тааттаҕа бырахтарыы туһунан миниистирдэр сэбиэттэрин тойонун кабинетыттан хотторон, сирэй-харах буолан тахсыбыппыт. Чурапчыга буолбут мунньахха суос-соҕотох кинини эрэ ыҥырбыттара. Онон үөр бөрөлөр ортолоругар хаалбыт соҕотох таба курдук тутан сии сыстылар диэбитэ. Ол да буоллар, төрөөбүт Аммабытын көмүскээбиппит, -- диэн Баһылай Харысхал суруйбута. Онон биһиги, билигин үлэлии олорор улуус дьокутааттара, оччотооҕу кэмҥэ сүҥкэн үлэни ыыппыт дьоммут холобурдарыгар, уопуттарыгар олоҕуран инники хардыыларбытын, үлэбит хайысхатын торумнуох тустаахпыт. Холобур, былырыын Ил Түмэҥҥэ уонна Экология министиэристибэтигэр киирэммит, Амма өрүс ураты статустанарыгар тэрээһини саҕалаабыппыт. Ол дьыалабытын тиһэҕэр тиэрдэргэ туруулаһан үлэлиибит, -- диэн дьокутааттар сэбиэттэрин бэрэссэдээтэлэ Владимир Колосов бэлиэтээтэ.

Кини санаатын ситэрэн төгүрүк остуол тула мустан олорооччулар, видео сибээһинэн холбоммуттар бука бары Дмитрий Спартаковичтыын алтыһан ааспыт кэмнэрин, ыыппыт үлэлэрин сылаастык, иһирэхтик ахтан-санаан аастылар. Үс чаастан ордук барбыт кэпсэтии кэмигэр кэргэнэ, үлэ бэтэрээнэ Наталья Емельянова, кыыһа Оксана Емельянова, улуус баһылыга Степан Кузьмин, Ис дьыала миниистирин солбуйааччынан, федеральнай судьуйанан үлэлии сылдьыбыт милииссийэ полковнига Петр Лазарев, РФ уопсай үөрэҕириитин бочуоттаах үлэһитэ, СӨ үөрэҕириитин туйгуна Клара Кириллина, 2002-2018 сс. Амма нэһилиэгин баһылыгынан үлэлээбит нэһилиэк бочуоттаах олохтооҕо, СӨ муниципальнай сулууспатын туйгуна, Дмитрий Емельянов ахтыы кинигэтин хос ааптара Людмила Васильева, РФ потребкооперациятын туйгуна, Амма улууһун уонна Чапчылҕан нэһилиэгин бочуоттаах олохтооҕо Николай Ксенофонтов, ХИФУ суруналыыстыкаҕа кафедратын сэбиэдиссэйэ, доцент, публицист, суруйааччы Олег Сидоров, Амма улууһун уонна Соморсун нэһилиэгин бочуоттаах олохтооҕо, СӨ үөрэҕириитин туйгуна, «Гражданскай килбиэн» бэлиэ хаһаайына Степан Бурнашев, РФ үөрэҕириитин туйгуна, СӨ үөрэҕириитин туйгуна, үтүөлээх үлэһитэ, Амма улууһун, Соморсун нэһилиэгин бочуттаах олохтооҕо Алексей Никифоров, СӨ Бырабыыталыстыбатын бэрэссэдээтэлин солбуйааччы секретариатын салайааччы Фаина Соколова, СӨ норуотун хаһаайыстыбатын үтүөлээх үлэһитэ, норуодунай суруйааччы, Амма улууһун баһылыгынан, Ил Түмэн дьокутаатынан үлэлээбит Дмитрий Наумов, СӨ үөрэҕириитин үтүөлээх үлэһитэ, уопсастыбаннай, судаарыстыбаннай диэйэтэл, 1997-1999 сс. Ыал, дьахтар, оҕо аймах кыһалҕаларын уонна демография политикатын кэмитиэтин салайааччы Анастасия Божедонова, СӨ норуотун хаһаайыстыбатын үтүөлээх үлэһитэ, Амма улууһун, Амма нэһилиэгин бочуоттаах олохтооҕо, муниципальнай сулууспа бэтэрээнэ Александра Шестакова, Амма улууһун баһылыгын социальнай боппуруостарга солбуйааччы, СӨ култууратын туйгуна, искусствоведение кандидата Ньургуйаана Илларионова уо.д.а. Дмитрий Спартаковиһы үтүө тылларынан ахтан-санаан аастылар, кини аатын үйэтитиигэ ыытыллыахтах үлэлэр хайысхаларын торумнаатылар, санааларын тиэртилэр.

Талааннаах киһи барыга талааннаах дииллэр. Бу этии Дмитрий Спартаковичка быһаччы сыһыаннаах. Аммалар биир холобур оҥостор киһибит сатабыллаах салайааччы буоларын тэҥэ элбэх ырыа ааптара, толорооччута, бэстибээллэрин лауреата, омук тылынан олус үчүгэйдик саҥарара, Германияттан Саха сиригэр киинэ уста кэлбит ДЕФА киинэ хампаанньатыгар тылбаасчыт быһыытынан эмиэ көмө буолбуттаах. Онон ханнык баҕарар хайысханан кини аатын ааттатар кыах улахан. Владимир Владимирович бэлиэтээбитинэн, сыл устата Дмитрий Емельяновка анаммыт тоҕус улахан тэрээһин күүтэр. Олортон бастакылара – «Депутатскай чаас» үйэтитии үлэтин аанын арыйда.

Тиэкис уонна хаартыскалар: «Амма олоҕо» хаһыаттан.