«Абаҕа» хааччахтаммыт эппиэтинэстээх уопсастыба өрөспүүбүлүкэҕэ хомуллар бурдук 8 %-ын хааччыйар. Хаһаайыстыба 591 гектар бааһынаҕа үлэлиир. Билиҥҥи туругунан, 9,5 гектардаах бааһынаттан 16 туонна сэлиэһинэйи, ол эбэтэр биир гектартан ортотунан 16,8 сэнтиниэр үүнүүнү хомуйан иһэр. Маны таһынан, 1220 туоннаны оттоон, былаанын 72 % толорбут, 1000 туонна сиилэһи. 350 туонна сенаһы бэлэмнээн, сүөһү сүмэһиннээх аһылыгар сорудаҕын 100 % толорбут.
«Абагаагро» тыа хаһаайыстытын кэпэрэтиибэ иллэрээ сыл сууккаҕа 3 туонна үүтү астыр үүт сыаҕын үлэҕэ киллэрбитэ. Кэпэрэтиип быйыл 24 туонна арыыны, 27 туонна үрүҥ ас арааһын итиэннэ 12,5 туонна эт аһы астыр соруктаах үлэли-хамсыы сылдьар.
Александр Фомин бааһынай хаһаайыстыбата быраҕыллыбыт бааһыналары сөргүтүүгэ холобур буолар. 2009 сылтан 80 гектардаах бааһынаны сөргүппүт, аҥардас хортуоппуйун сирин 85 гектарга тиэрдибит. Ууну кытара ситимин саҥардыбыт, 500 туонна хортуоппуйу харайар ыскылааттаах. Билигин хомуур үгэнэ, бааһынай бэйэтэ барыллаан, 1000 туонна хортуоппуйу хомуйарга суоттанар.
Оробуочай сырыы түмүгүнэн, Сергей Местников Амма аграрийдарын сыралаах үлэлэрин үрдүктүк сыаналаата, судаарыстыба өйөбүлүн үлэлиир усулуобуйаны тупсарыыга, ылыллар бородууксуйа кээмэйин, хаачыстыбатын үрдэтиигэ көдьүүстээхтик туһаналларын бэлиэтээтэ. Бу кирбиини ыһыктыбакка, салгыы өссө таһаарыылаахтык үлэлииргэ ыҥырда диэн Ил Дархан уонна Бырабыыталыстыба пресс-сулууспата иһитиннэрэр.
Хаартыска: Ил Дархан уонна Бырабыыталыстыба саайта.
-
0
-
0
-
0
-
0
-
0
-
0
