Уопсастыба

Үөрэх уонна билим министиэристибэтин чахчытынан, өрөспүүбүлүкэ үрдүнэн сыллата 550 лааҕыр үлэлиир, олорго 100 тыһыынча оҕо хабыллар. Хайысхаларынан ылан көрдөххө, лааҕырдар баһыйар үгүстэрэ доруобуйаны чэбдигирдиигэ, кыраайы үөрэтиигэ, успуорт араас көрүҥнэригэр уонна биридимиэттэринэн эбии дьарыктааһыҥҥа идэтийэллэр. Агрооскуолаларга баар үлэ-сынньалаҥ лааҕырдара оҕолору тыа сирин үлэтигэр уһуйаллар, 70-тан тахса күнүскү лааҕыр оскуола таһынааҕы учаастактарга оҕуруот аһын, сибэккилэри көрүүгэ-истиигэ үлэлииллэр. Ону таһынан хас эмит сүүһүнэн оҕо дойду араас лааҕырдарыгар сынньанар, онуоха ураты болҕомто Анал байыаннай дьайыы байыастарын оҕолоругар ууруллар.

«Арассыыйа Федерациятыгар оҕо быраабын сүрүн мэктиэлэрин туһунан» федеральнай сокуоҥҥа олоҕуран, 2024 с. ахсынньы 28 күнүгэр бигэргэммит лааҕырдар иитэр үлэлэрин биир кэлим бырагырааматыгар Арассыыйа норуоттарын култуурунай нэһилиэстибэлэригэр уонна төрүт үгэстэригэр харыстабыллаахтык сыһыаннаһар наадата ыйыллыбыта. Ону учуоттаан, Үөрэҕириини сайыннарар уонна идэни үрдэтэр үнүстүүт бэйэтин бырайыагар 2030 сылга диэри этнокултуурунай үөрэхтээһининэн лааҕырдар 50 %-нарын хабар соругу туруорда.

Биридимиэттэринэн эбии дьарыктааһыҥҥа идэтийэр лааҕырдартан 86 лааҕыр төрөөбүт тылга дьарыктыыр. Кинилэр кэккэлэригэр Дьокуускай куоракка 1999 сылтан үлэлиир «Березка» лааҕыр биир бэлиэ миэстэни ылар. Лааҕыр тэрийээччитэ, салайааччыта Татьяна Березкина маннык кэпсиир:

– Биһиги лааҕырбыт быйыл 27-с сылын үлэлиир. Бу сыллар тухары баай уопуту мунньан, элбэх үтүө үгэстэрдээх кэлэктиип буоллубут. Ол курдук, ааспыт сылларга лааҕырга сылдьыбыт оҕолор араас үрдүк үөрэх кыһаларыгар устудьуоннуур сылларыгар сайыҥҥы уһун өрөбүллэригэр кэлэн үлэлииллэр, Москуба, Санкт-Петербург уо.д.а. куораттарга олохсуйбут саха ыаллара оҕолорун биһиэхэ ыытан дьарыктыыллар. Биир сезон икки нэдиэлэлээх, түмүк тэрээһиҥҥэ хас биирдии оҕо презентация оҥорон көмүскүүр (билиҥҥи күрэстэһиилэх кэм оҕолоро ону сүрдээҕин сөбүлүүллэр).

Лааҕырбыт күнүскү, киин куорат хабыллар хаба ортотугар, Ленин проспегын 1 №-гэр, IT park дьиэтин үһүс этээһигэр, Оҕо бибилэтиэкэтин баазатыгар үлэлиир. Манна 6-16 саастаах оҕолор сарсыарда 9 чаастан киэһэ 6 чааска диэри сылдьаллар, куорат 2 №-дээх оскуолатын остолобуойугар күҥҥэ иккитэ аһыыллар.

Куоракка олорор саха оҕото хайаан да төрөөбүт тылын, төрүт култууратын билиэхтээх, ону таһынан омук тылын кынат оҥостуохтаах диэммит, сүрүн дьарыкпыт – саха уонна аангылыйа тылларыгар туһаайыллар. Ону таһынан, гитаранан ыллыырга, хомуска оонньуурга, үҥкүүгэ, аныгы кэм ирдэбилинэн, компьютер технологияларыгар, ол иһигэр, оҥоһуу өйгө, дьарыктыыбыт. Бэйэ санаатын көмүскүүргэ, публика иннигэр саҥарарга-иҥэрэргэ, хамаанданан үлэлииргэ үөрэтэбит. Урукку сыллартан Ем. Ярославскай аатынан Кыраайы үөрэтэр өрөспүүбүлүкэтээҕи түмэли, Саха Сирин норуоттарын муусукатын уонна фольклорун түмэлин, Сэлии түмэлин кытары үлэлиибит. Онон, бу түмэллэргэ уонна киинэ тыйаатырдарыгар, пааркаҕа сырытыннарабыт. Кистэл буолбатах, билиҥҥи оҕолор сыыппара эйгэтигэр, социальнай ситимнэргэ наһаа ыллардылар, үгүстэр бэйэлэригэр бүгэллэр, ону учуоттаан, кинилэр саастыылаахтарын кытары бодоруһар, оскуолаҕа ылбыт билиилэрин-көрүүлэрин чиҥэтэр, урут болҕойботохторун бэлиэтиир, атын хараҕынан көрөр эйгэлэрин тэрийэргэ кыһаллабыт. Сезону ыһыаҕынан түмүктүүбүт.

«Березка» лааҕыр оҕолорго ыытыллар араас тэрээһиннэргэ көхтөөхтүк кыттар, наада буоллаҕына, спонсордыыр. Ол курдук, «Ил Түмэн» издательскай дьиэ Улуу Кыайыы 80 сылын көрсө тэрийбит «Кыайыыны кынаттыыр ырыалар» диэн күрэҕэр оҕолорго бастакы миэстэни ылбыт Елизавета Константинова бу лааҕырга путевканан наҕараадаламмыта. Ырыаһыт кыысчаан билигин лааҕыр аһылларын кэтэһэ сылдьар.

Бастакы сезон бэс ыйын 9-20 күннэригэр, иккис сезон от ыйын 7-18 күннэригэр үлэлиэхтэрэ. Төлөбүрэ: 22 тыһыынча солкуобай, элбэх оҕолоох ыалларга 10 %-наах чэпчэтии көрүллэр. Ким интэриэһиргээбит маннык төлөпүөннэринэн (бассаабынан) билсиҥ: +7967 926-50-32, +7914 270-27-46, +7996 914-12-21.

Хаартыскалар: «Березка» лааҕыр архыыбыттан.