Уопсастыба

Номоххо киирбит саха ааттааҕа, көҥүлгэ дьулуспут, саппаҕырбат санаалаах Баһылай Манчаары аатынан XXII Оонньуулар уоттарын саҕар тэрээһиҥҥэ, Таатта улууһун баһылыга Айаал Бурцев, улуус баһылыгын социальнай боппуруоска солбуйааччы Святослав Сунхалыров, успуор бэтэрээнэ Филипп Гуляев, уопсастыбанньыт, успуор пропагандиһа Анатолий Мурунов, мас тардыһыытыгар Аан дойду түөрт төгүллээх чөмпүйүөнэ Туяра Орлова, Алампа аатынан Ытык Күөл 1 №-дээх оскуолатын үөрэнээччитэ, мас тардыһааччы Айтал Винокуров, улуус дьаһалтатын исписэлииһэ Саина Рахлеева, улуустааҕы успуор салаатын исписэлииһэ Антонина Винокурова, ыччат салаатын исписэлииһэ Анастасия Габышева уо.д.а кыттыыны ыллылар.

Успуор эйгэтигэр ураты суолтаны ылар тэрээһини алгысчыт Илгэлээх Испирдиэн көмүлүөгү оттон, Үөһэ Айыылартан көрдөһөн, алгыстаах кыымы ылан Оонньуулар уоттарын уматта. Итиэннэ Мэҥэ Хаҥалас улууһун баһылыгар Дмитрий Тихоновка туттарда.  

Дмитрий Иванович ытык сир илгэлээх буоругар төрөөбүт, көҥүл иһин охсуспут, дуулаҕа бухатыыр Баһылай Манчаары аата-суола умнуллубакка, төрүт көрүҥнэр Оонньуулара буола, үйэлэри ситимнии, саха киһитин кыаҕын-уоҕун көрдөрөрүн бэлиэтээтэ. Итиэннэ уоту Саха Өрөспүүбүлүкэтин физическэй култуураҕа уонна успуорка миниистиригэр Леонид Спиридоновка туттарда. Кини XXII “Манчаары оонньууларын” уотун арыаллыыр бөлөх салайааччытыгар Дмитрий Гороховка туттарда.  

Онтон уоту туппут Таатта улууһун баһылыга Айаал Бурцев: “Бу кыра кыым саха ааттаахтарын түһүлгэтин түстүү Мэҥэ Хаҥалаһынан, Дьокуускайынан, Чурапчынан, Тааттанан барыбытын ситимнии, кыаҕы-күүһү көрдөрө, Оонньуулар аһыллыыларыгар от ыйын 8 күнүгэр “Дьулуруйар Ньургун Боотур” стадиоҥҥа тиийиэҕэ. Бүгүҥҥү тэрээһин самаан сайыммыт саамай уһун кэмигэр ыытыллыбыта, бэйэтэ биир бэлиэ күн буолар”, -- диэн эттэ. Тэрээһиҥҥэ  Саха Өрөспүүбүлүкэтин  Ил Түмэн дьокутаата, РФ үтүөлээх маастара Василий Егоров, Башкир омук уопсастыбаннай деятелэ, юридическай наука доктора, суруйааччы, скульптор  Рафаил Зинуров, Саха Өрөспүүбүлүкэтин Арктикаҕа бэрэстэбиитэлэ Александр Акимов тыл эттилэр.

Биир долгутуулаах чааһынан алаас саҕатыгар турар Манчаары Баһылай оҕо эрдэҕиттэн сүгүрүйэ улааппыт, алааһын ахтылҕанын таһаарар аарыма тиититтэн ньэгир ылыыта буолла. Ытык бэс лабаалара халлааҥҥа харбыалаһа үүммүтэ, былыт саппыт ааспыты саната, Манчаарыны кэпсииргэ дылы, тула үүммүт ойуур тыа, от-мас сайыҥҥы сытынан дыргыйа турара барыбытын сөхтөрдө. Оонньуулар уоттарын бэтэрээн ыспарсымыаннар, өрөспүүбүлүкэ биллэр-көстөр сүүрүктэрэ Дмитрий Горохов, Екатерина Драгунова, Владимир Тордуин, Владимир Находкин, Александра Мохначевская, Мария Дьяконова туппутунан Майа суолун туттулар.

 Бу курдук, Арыылаах төгүрүк алааһыттан, Манчаары уол оҕо буолан төрөөбүт балаҕанын көмүлүөгүттэн ылыллыбыт кыым, XXII Оонньууларга ымыы буолан, барыбытын түмүөҕэ, кыайыыны-хотууну аҕалыаҕа.

Улуустааҕы Манчаары ооннууларын Пресс киинэ