Дьаарбаҥканы Үөрэх уонна билим министиэристибэтин өйөбүлүнэн, Үөһээ Бүлүү улууһун үөрэҕин управлениета, «Эврика-Кэриэн Уhуйуу» ассоциация, Үөрэҕирии инновационнай сайдыытын киинэ, С.Н. Донской-II аатынан Үөрэх үлэһиттэрин сайдыытын уонна идэни үрдэтэр үнүстүүт тэрийэн ыыттылар.
Оскуола нэһилиэк оргуйар олоҕун киинэ буоларын быһыытынан, быйылгы дьаарбаҥка иитэр-үөрэтэр тэрилтэлэр тыа сирин социальнай-экэнэмиичэскэй сайдыытыгар ылар оруолларыгар туһуланна. Онон дьаарбаҥка кыттыылаахтара тустаах иитэр-үөрэтэр үлэлэрин сэргэ олохтоох дьаһалталары уонна уопсастыбаннаһы кытары хайдах быһыылаахтык үлэлииллэрин сырдаттылар, уопут атастастылар.
Киэһэтин араас култуурунай тэрээһиннэр ыытылыннылар. Олортон биирдэстэрэ – поэт, рок-ырыаһыт, инноватор-педагог, Саха Өрөспүүбүлүкэтин үөрэҕириитин туйгуна, дьон кутун-сүрүн туппут үгүс ырыалар ааптардара Николай Сибиряков кэриэһигэр анаммыт «Истин иэйии» диэн гитаранан ырыа күрэҕэ от ыйын 1 күнүгэр Дорҕоон түһүлгэҕэ ыытылынна. Сүрүн тэрийээччилэр: улуус үөрэҕин салалтата, Н.И.Бойлохов аатынан оҕо ускуустубатын оскуолата.
Күрэххэ барыта 11 киһи кытынна, Николай Сибиряков айбыт ырыаларын гитаранан толордулар. Күрэх түмүгүнэн III миэстэни – Саргылаана Неустроева (Чурапчы улууһа), II миэстэни – Ия Алексеева (Үөһээ Бүлүү, М.А. Алексеев аатынан интэринээт-лиссиэй), I миэстэни – Евдокия Гаврильева (Үөһээ Бүлүү, Нам оҕо сайдар киинэ) ыланнар, ырыа күрэҕин саҕалааччылар (Чурапчы улууһун үөрэҕин салалтатын уонна Үөрэҕи сайыннарар киин) олохтообут бириистэрин туттулар.
-
8
-
1
-
0
-
0
-
0
-
0
