Булуҥ сэлиэнньэтэ уһун тыыннаах Таатта үрэхпит төрдүгэр, дохсун сүүрүктээх Алдан өрүс тус хоту устар өрүһүн үрдүгэр турар. Манна айылҕаттан анаан, Тааттаны “Таатта” дэппит улуу-чулуу дьон төрөөн-үөскээн ааспыттара. Күн бүгүн кинилэр сыдьааннара саҥа үйэ сайдыытын түстүүллэр, өрүү биир санаанан айаллар-туталлар. Ол холобурунан бүгүҥҥү “Айылгы” туосчуттар бэлэхтэрэ холобур буолла.
-- Биһиги түмсүүбүт 2017 с. тэриллибитэ. Тумус туттар киһибит Мандар Уус Моҕол ураһатын тутуутуттан тирэхтэнэн, өбүгэ ииһин тыынын бэйэбитигэр иҥэринэн, нэһилиэкпит, улууспут саха итэҕэлин тутуһан, биир санаанан, кэмҥэ сөп түбэһиннэрэн сайдыыны түстүү, сомоҕолоһон олорорбут туһугар өбүгэ үгэһин күннээҕи олохпутугар тутуһа сылдьар сыалтан “Түөрт саханы төрөт, үс саханы үөскэт” диэн Кэһэх оһуору уонна саха төрдө буолбут ынах-сылгы бэлиэлээх, ыаҕайалардаах 21 миэтэрэ усталаах саламаны, улууспут Аҕа баһылыгар Айаал Бурцевка туттардыбыт. Бу саха кутун-сүрүн, олоҕун-дьаһаҕын көрдөрөр салама илии сылааһынан оҥоһуллубутун курдук, улуус олохтоохторо бука бары сиэттиспитинэн, биир санаанан үлэлиэхтээхпит, олоруохтаахпыт, сайдыыны түстүөхтээхпит. Маннык күүс дьиҥ сахалыы куттаах Таатталарга, биһиэхэ, хааммытыгар баар! – диэтэ түмсүү салайааччыта Матрена Малышева.
Улуус Бэтэрээннэрин сэбиэтин бырайыагынан, 200-тэн тахса олбох тигилиннэ. Хас биирдии олбох улууспут нэһилиэктэрин көрдөрөр өҥнөрүнэн аттарыллыбыт. Ол курдук, Алдан, Амма өрүстэр нэһилиэктэрэ -- халлаан күөх, алаас сирдээх нэһилиэктэр -- от күөх, уустар уутуйан үөскээбит Баайаҕалара -- дьэрэкээн ойуунан тигилиннилэр. Олбохтор ойууларын Саха Өрөспүүбүлүкэтин норуотун маастара Арина Большакова оҥордо. Бу курдук "Манчаары оонньууларын" чэрчитинэн ыытыллыбыт икки бырайыак олоххо киирдэ. Булуҥнар эппиттэрин курдук, “биир сомоҕо буолуу -- сайдыы төрдө”.
“Манчаары оонньууларын” улуустааҕы пресс-киинэ
-
8
-
0
-
0
-
0
-
1
-
0
