Уопсастыба

Наталья, Виктор Разувановтар салайар «Славянские традиции» хааччахтаммыт эппиэтинэстээх тэрилтэлэрэ Уһук Илини кэрийэ сылдьан атыылаабыта асхыс сылыгар барбыт. Наталья хос эбэм эбэҥки этэ, ол иһин бу диэки тардыллабын быһыылаах диэн үөрэ-көтө кэпсиир. Белоруссияҕа хас биирдии гектар сир туһаҕа турарын, элбэх пиэрмэ баарын, Батько Лукашенко сайдыы барарыгар, норуот тоттук олороругар наһаа кыһаллар диэн Бэрэсидьиэннэрин истиҥник, киэн тутта сэһэргиирин киһи үөрэ истэр. Дьиэ кэргэнинэн бииргэ тутуһан үлэлииллэрэ олус таһаарыылаах эбит, бородуукталара барыта Белорусскияҕа оҥоһуллубут. Халбаһыны атыылыырга кыыстара Милана, чэйгэ, мүөккэ күтүөт Иван, кэмпиэттэргэ Аня тураллар. Ону таһынан харабыл, суоппар бааллар. Онон бу сэттэ киһи кулун тутар ыйтан сэтинньигэ диэри көлүөһэ үрдүгэр сылдьаллар эбит. Дьиэлэригэр үс эрэ ый курдук буолалларын, дьиэни-уоту биир кыыһа кэргэнинээн уонна ийэтэ көрөллөрүн, икки сиэннээҕин хаһаайка кэпсээниттэн биллим. Таһырдьа туран үлэлиир буоланнар, саас сылыйда да, кулун тутар ыйтан, Благовещенскайтан саҕалаан айаҥҥа туруналлар эбит. Благовещенскайга Белоруссия аһын-үөлүн атыылыыр эргиэн дьиэтин аспыттар.

Ханна да сырытталлар, оҕо дьиэлэригэр, кыһалҕалаахтарга уонна АБДь байыастарыгар көмөнү тэрийэр түмсүүлэргэ ис сүрэхтэриттэн көмөлөһөллөр эбит. Ону биһиги «харысхаллар» бэйэбитинэн биллибит. Ол курдук, хахха сиэккэтин өрөр матырыйаалы атыылаһарга анаан 20 000 тыһыынча солкуобайы биэрдилэр, чэйдииргитигэр диэн чэйинэн, барыанньанан, мүөтүнэн күндүлээтилэр. «Харысхал» түмсүү кыттыылаахтара элбэх идиэйэлээх киһибит Альбина Федорова: «Хардатын, махталбыт бэлиэтин алаадьы, харысхал илдьэн биэриэххэ», -- диэбитин иилэ хабан ыламмыт, кыра кэһиилээх тиийбиппитигэр барахсаттар үөрбүттэриэн! Омуктар омук курдук үөрбүттэрэ сирэйдэригэр-харахтарыгар көстөн, кэпсэтэн-ипсэтэн хаартыскаҕа хатанныбыт.
– Мы всегда и везде помогаем, но вот впервые вы пришли с ответным визитом, с благодарностью, – диэн күтүөт Иван эппитэ кулгаахпытыгар кэрэ муусука буолан киирдэ. «Манна үчүгэй, оннооҕор Кэмпэндээйкэҕэ сордоҥ хабар» диэн уол дэлэй кэпсээннээх, сайаҕас киһи буолан биэрдэ.
Дьон үөрбүтүттэн бэйэбит үөрэн-көтөн балаҕаммытыгар киирээппитин кытта, биирдэм урбаанньыт Василий Прокопьев 10 000 солк. аҕалан туттарда. Урукку өттүгэр кини сиэккэлэрбитин умайбат суудараһынынан ыстарааччы. «Үчүгэй үтүө өттүктээх» диэн өс хоһооно кэтэһиннэрбэтэ. Наталья Викторовна эмиэ куруук ылбыккыттан, оҥорбуккуттан дохуотуҥ хас эрэ чааһын үллэстиэхтээххин диэн киэҥ дэлэгэй санаалаах эбит. Хаһан баҕарар биэрбит үс бүк үллэн төннөр диэн өйдөбүл бары норуокка баар.
Бу курдук ханна да сырыттыннар куруук үтүөнү, үчүгэйи оҥорор Наталья, Виктор Разувановтар дьон-норуот махталыттан, араас министиэристибэлэр билиниилэригэр тиийэ улахан үлэлэригэр Сунтаар сирин эйэҕэс эбэлэрин, истиҥ ийэлэрин ааттарыттан махталбытын тиэрдэбит, куруук сайдыҥ, чэчирээҥ, кэҥээҥ диэн алгыспытын аныыбыт. Бу курдук бары бииргэ үрдүбүтүгэр эйэлээх халлаан, үрүҥ күн күлэ-үөрэ күлэрин курдук сомоҕолоһуохха!

Хаартысканы ааптар ыытта.