Чэгиэн-чэбдик доруобуйаны, дьолу-соргуну, табыллыыны, айымньылаах үлэни баҕарабыт.
Истиҥ эҕэрдэни кытары «Ил Түмэн» издательскай дьиэ кэллэктиибэ.
Ыспыраапка:
Александра Михайловна Григорьева-Сандаарыйа 1955 сыллаахха, балаҕан ыйын 8 күнүгэр Сунтаар улууһугар Элгээйигэ учуутал дьиэ кэргэнигэр төрөөбүтэ. Айар үлэҕэ оскуолаҕа үөрэнэр сылларыгар ылсыбыта. Баара-суоҕа 10 саастааҕар «Бэлэм буол» хаһыакка «Бып-быычыкаан оҕонньор» диэн остуоруйата бэчээттэммитэ. Ити кэмтэн ыла кини бу хаһыакка юнкор буолан, оскуолатын туһунан суруйар буолбута. СГУ саха тылын салаатын 1982 с. бүтэрэн, бастаан Сунтаар, кэлин Дьокуускай куорат оскуолаларыгар саха тылын уонна литэрэтиирэтин учууталынан таһаарыылаахтык үлэлээбитэ. Оҕо дьоҕурун сайыннарыыга үлэлээбит уопутугар олоҕуран, элбэх бырагырааманы суруйбута, босуобуйалары оҥорбута өрөспүүбүлүкэҕэ биһирэбили ылан, туһанылла сылдьар.
2012 сылтан М.К.Аммосов аатынан ХИФУ Мииринэйдээҕи салаатыгар, Карьера уонна үлэни булуу киинин сэбиэдиссэйинэн үтүө суобастаахтык үлэлээбитэ. Светлай бөһүөлэгэр олорор. Төһө да бочуоттаах сынньалаҥҥа таҕыстар, быар куустан олорбот, араас омук бэрэстэбиитэллэрин биир иллээх дьиэ кэргэҥҥэ түмпүт куораттыы тииптээх бөһүөлэккэ сахалыы эйгэни тэрийэр, биһиги эрэдээксийэбитин кытары үлэлэһэр. Үлэ дьонун туһунан кэрэ сонуннаах матырыйааллары ыытан, хаһыаппытын байытыһар.
КҮӨХ ТҮҮЛ
Александра Григорьева тыллара,
Светлана Петрова матыыба
Нуһараҥ ыйдаҥа түннүкпэр
Чуумпутук толбонун кутара,
Түүн солко баттаҕын тараана,
Ийэлии нарыннык бигиирэ.
Түһүүрүм эриэккэс да түүлү
Абылаҥ, долгураҥ күөх түүҥҥэ,
Арылхай, чаҕылхай сибэкки
Мичээрдиир эйэҕэс күөх түүлүн.
Сарсыарда им сырдаан, сардаҥа
Түннүкпэр кылыҥкай ойуута,
Уйаҕас сибэкким эмискэ
Умуллан сарыалга сүппүтэ.
Сибэккиэм, эйигин сайыһа,
Былыкка мин кыайан көппөппүн,
«Төнүн», -- диэн батыһа, ааттаһа
Көрдөһөр быраабым эмиэ суох.
Нуһараҥ ыйдаҥа түннүкпэр
Чуумпутук толбонун кутара,
Түүн солко баттаҕын тараана,
Ийэлии нарыннык бигиирэ.
Түһүүрүм эриэккэс да түүлү
Абылаҥ, долгураҥ күөх түүҥҥэ,
Арылхай, чаҕылхай сибэкки
Мичээрдиир эйэҕэс күөх түүлүн.
Оо, арай махтаныам эйиэхэ,
Сып-сырдык тырымнас киһиэхэ,
Ким эрэ анала алҕаска
Мин түүлбэр ыалдьыттаан ааспыккар.
Түһүүрүм эриэккэс да түүлү
Абылаҥ, долгураҥ күөх түүҥҥэ,
Арылхай, чаҕылхай сибэкки
Мичээрдиир эйэҕэс күөх түүлүн.
-
1
-
1
-
0
-
0
-
0
-
0
