Култуура тыынынан арыллыбыт мунньах, Саха сиригэр Култуура сыла биллэриллибитинэн, мунньах олус уратытык — төрүт үгэспитинэн, Олоҥхонон арылынна.
Ил Дархан стипендиата, Олоҥхо ыһыаҕын муҥутуур кыайыылааҕа Сусанна Васильевна Лазарева чаҕылхай олоҥхото саала иһигэр мустубут ыалдьыттары сөхтөрдө, сэргэхситтэ. Бу — мунньахха үрдүк тыыны уонна ис хоһоонноох саҕалааһыны биэрдэ.
Үлэни өрө туппут дьоммут — биһиги киэн туттуубут. Тэрээһин үөрүүлээх чааһыгар уһун сыралаах үлэ бэркэ бэлиэтэннэ.
Өр сыллаах ситиһиилээх үлэтин иһин, Василий Яковлев-Далан аатынан Кытаанах орто оскуолатын алын сүһүөх кылаас учуутала Анисия Николаевна Дьяконоваҕа “Чурапчы улууһа” МО баһылыгын махтал суруга уонна өйдөбүнньүк (памятнай) бэлиэ туттарылынна.
Мунньахха улуус тэрилтэлэрин салайааччылара толору састаабынан кэлэн кыттыыны ыллылар.
Олохтоохтор хочуолунайга эбии оһоҕу, суол оҥоһуутун, култуура дьиэтин өрөмүөнүн туруорсар боппуруостарыгар, нэһилиэк кыһалҕаларыгар тута миэстэтигэр дириҥ ис хоһоонноох эппиэттэри биэрдилэр. Бу — былаас уонна норуот икки ардыгар дьиҥнээх ситим баарын толору көрдөрдө.
Мунньах саамай кэтэһиилээх уонна долгутуулаах түгэнинэн — нэһилиэккэ саҥа успуорт саалатын тутуутун туһунан сонун буолла.
Улуус баһылыга, ССРС уонна Саха АССР үтүөлээх тириэньэрэ Дмитрий Петрович Коркин төрөөбүтэ 100 сыллаах үбүлүөйүн көрсө, Кытаанахха саҥа успуорт саала тутулларын толору өйүүрүн туһунан үөрүүлээх сонуну иһитиннэрдэ. Инньэ диэн туран Степан Анатольевич, Кытаанахтарга, тутуллан эрэр тустуу саалата үлэҕэ киириитигэр, ситэри тутуллуутугар 500 тыһыынча суумманы көрөрүн биллэрдэ.
Бу сонуну олохтоохтор уруйдуу-айхаллыы ылыннылар. Саҥа успуорт саала тутуллуута — эдэр көлүөнэ ыспарсымыаннарбытыгар, нэһилиэк ыччатыгар уонна бары олохтоохторугар сайдыыга саҥа хардыыны, чэгиэн олоххо улахан кыаҕы үөскэтэрэ саарбахтаммат.
Кытаанах нэһилиэгэ бүгүҥҥү күҥҥэ сайдыы суолугар бигэ эрэллээҕэ, дьон түмсүүлээҕэ уонна инникитин дьэҥкэтик көрөрө мунньах хас биирдии түгэнигэр билиннэ.
Сонун төрдө уонна хаарытска: Лена Пономарева, “Саҥа олох” хаһыат уопсастыбаннай кэрэспэдьиэнэ
Бэлэмнээтэ Сэмэн ЖЕНДРИНСКЭЙ
-
0
-
0
-
0
-
0
-
0
-
0
