Тыл – омук бараммат баайа, өбүгэлиин ситимэ, кэлэр кэскилэ. Ийэ тыл күнэ саха норуотун бастакы лингвист-учуонайа, сахалыы алпаабыт уонна букубаар ааптара Семен Андреевич Новгородов төрөөбүт күнүгэр сөп түбэhиннэрэн, өрөспүүбүлүкэ Бастакы Бэрэсидьиэнэ Михаил Ефимович Николаев анал ыйааҕынан, 30 сыл анараа өттүгэр олохтоммута.
2026 сыл Арассыыйаҕа Сомоҕолоhуу сылынан, Саха Өрөспүүбүлүкэтигэр Култуура сылынан биллэриллибитинэн, быйыл бу бэлиэ күн ураты суолталаах. Тыл – норуоту сомоҕолуур, түмэр, култуура ис хоhоонун толору арыйар cүдү күүс.
Төрөөбүт тыллар сокуон өттүттэн көмүскэллээх буолаллара – парламент биир сүрүн соруга. Ааспыт сылга тыл бэлиитикэтин сүрүннүүр федеральнай сокуоннар барылларын оҥорууга уонна дьүүллэhиигэ норуот дьокутааттара төрөөбүт тыллар суолталарын намтаппат туhугар дириҥ ис хоhоонноох үлэни ыыппыттара. Төрдүс сылын Саха Ѳрѳспүүбүлүкэтин сокуоннарын барыллара Ил Түмэҥҥэ нууччалыы уонна сахалыы киирэллэр, сокуоннар тиэкистэрэ икки тылынан тэҥ ис хоhоонноох буолалларын хааччыйар Ил Түмэн анал хамыыhыйата үлэлиир.
«Саха Өрөспүүбүлүкэтин судаарыстыбаннай уонна дьиҥ таhымнаах тылларын харыстааhын уонна сайыннарыы» судаарыстыбаннай бырагыраама чэрчитинэн саха тылын үөрэтиигэ аналлаах кинигэлэр, бырагыраамалар билимҥэ олоҕуран саҥардыллалларыгар, куйаар ситимигэр сахалыы эйгэ кэҥииригэр, уус-уран литература сайдарыгар, саха тылынан ойуулуктар, киинэлэр оҥоhуллалларыгар үлэ барар.
Саргылаах сахабыт тылын кэлэр кѳлүөнэҕэ тиэрдии биhиги ытык иэспит. Төрөөбүт тылбыт инники кэскилэ билигин биhигиттэн тутулуктаах. Хас биирдии бэйэбит тылбытын харыстаан, араҥаччылаан, салгыы эйгэтин кэҥэтэр туhугар үлэлээтэхпитинэ-хамсаатахпытына тылбыт чөл хаалыа. Илгэлээх ийэ тылбыт үйэлэргэ сайда, туругура турдун!
Алексей Еремеев, Саха Өрөспүүбүлүкэтин Ил Түмэнин Бэрэссэдээтэлэ
-
0
-
0
-
0
-
0
-
0
-
0
