Норуот дьокутааттара, тылга уонна төрүт култуураҕа сыһыаннаах биэдэмистибэлэр, уопсастыбанай түмсүүлэр бэрэстэбиитэллэрэ, учуонайдар, суруйааччылар, учууталлар түмсэннэр, саха уонна төрүт олохтоох, аҕыйах ахсааннаах хотугу омуктар (эбээннэр, эбэҥкилэр, дьүкээгирдэр, чукчалар уонна дулгааннар) тылларын, суруктарын-бичиктэрин билиҥҥи туругун итиэннэ сайдар саҕахтарын туһунан кэпсэттилэр. Тыл бэлиитикэтигэр нуормалыыр быраап баазатын тупсарар, тыллары харааннааһыҥҥа, сайыннарыыга тус сыаллаах бырагыраамалары, лингвистикэ билимин үгэстэрин өйүүр наадатын бэлиэтээтилэр, хотугу омуктар тыллара ураты көрүүгэ-истиигэ, салгыы сайыннарыыга наадыйарын эттилэр.
Мунньаҕы Ил Түмэн билимҥэ уонна үөрэххэ сис кэмитиэтин бэрэссэдээтэлэ Антонина Григорьева иилээн-саҕалаан ыытта. Мунньах арыллыытыгар кини мустубуттары буолаары турар Төрөөбүт тылбыт уона сурукпут-бичикпит күнүнэн истиҥник эҥэрдэлээтэ. “Бүгүҥҥү төгүрүк остуолбут ийэ тылбыт тыын боппуруостарыгар, сайдар кэскилигэр, үөрэх эйгэтигэр ананар. Биһиги өрөспүүбүлүкэбитигэр икки судаарыстыбаннай уонна биэс дьиҥ таһымнаах тыллар тэҥҥэ туттуллаллар. Чинчийэр үлэ ыытыллара сүрүн сокуоммутугар уонна үөрэх, билим, култуура тыл сокуоннарыгар олоҕуран ирдэниллэр. Онон төрөөбүт тылбыт кэскилин, туругун ырытыһан, санаа атастаһан олоххо киллэрэргэ бу кэпсэтиини тэрийэбит”, -- диэн эттэ.
Мунньах иннинэ билим Академиятын иһинэн үлэлиир төрөөбүт тыллары үөрэтии, харыстааһын уонна сайыннарыы киинин салайааччыта, педагогическай билим дуоктара, бэрэпиэссэр, Ил Түмэн алтыс ыҥырыылаах мунньаҕын дьокутаата Феодосия Габышева суруналыыстарга кылгастык кэммэнтээрий биэрдэ. Онно иһитиннэрбитинэн, тыл боппуруоһа дойду таһымыгар сүрдээх күүскэ турар. Тыл чахчы сайдыы төрдө, төрүөтэ буолар. Тылы сайыннарыыга туһуламмыт стратегическай докумуоннар дойдубут бэрэсидьиэнэ Владимир Путин дьаһалынан бигэргэнэн тураллар, сүрүн хайысхабыт арылыччы көстөр. Биһиги өрөспүүбүлүкэбитигэр эмиэ тустаах докумуоннар ылыллан үлэлииллэр. “Дойду үрдүнэн билигин улахан уларыйыы буолаары турар. Норуоттар тыллара атыннык ааттанан, “Российскай Федерация тылларын сокуона” диэн сокуон барыла дьүүллэнэ сылдьар. Бу докумуон улахан уларытыылары киллэриэ”, -- диэн эттэ.
Саҥа сокуон барылын уонна төгүрүк остуол тула кэпсэтии түмүгүнэн киирбит этиилэри, санаалары “Ил Түмэн” хаһыат аныгыскы нүөмэригэр ааҕыҥ.
Галина МАТВЕЕВА
Ааптар хаартыскаҕа түһэриилэрэ.
-
0
-
0
-
0
-
0
-
0
-
0
