Биһиги быйылгы лауреттары кытары үөрүүлэрин тэҥҥэ үллэстэ таарыйа кыратык билистибит.
Александр Попов, “Сахабэчээт” СӨ судаарыстыбаннай аптаныамынай тэрилтэтин “Анаабыр уоттара” хаһыат эрэдээксийэтин бэчээттээччитэ:
– “Анаабыр уоттара” хаһыакка 52 сыл устата үлэлээтим. Ил Дархан дьаһалынан тэриллибит “Үлэ киһитэ” бириэмийэни тутарбар анаан Анаабыртан кэллим. Бэйэм “Наладчик полиграфического оборудования” диэн идэни Новосибирскай куоракка 4-с №-дээх полиграфистар техникумнарыгар баһылаабытым. Урут хаһыаты барытын илиинэн таҥарбыт, версткатын бэйэм оҥорооччубун, кэлин ленотип кэлбитэ. Сибиниэс уулларан хас биирдии буукубаны оҥорорбут.
Хотулартан бастакынан 1995 сылга компьютерынан таҥыы киирбитэ. Бэчээттиир массыына Дьоппуоньуйаҕа оҥоһуллубут “Ризограф” диэн этэ. Үлэбит биллэ чэпчээбитэ. Билигин даҕаны эрэдээксийэбэр үлэлиибин. Хаһыаппын бэчээттиибин, улуус киинигэр 100-тэн тахса экземпляры аадырыстарынан тарҕатабын.
Эрэдээксийэни кытары олоҕум ыкса ситимнээх. Манна үлэлии сылдьан кэргэмминээн Татьяна Михайловналыын холбоспуппут. Бииргэ олорбуппут номнуо 47 сыл буолла. Оҕолордоохпут, сиэннэрдэхпит.
Хоту олорор дьоҥҥо биир саамай сытыы боппуруос – бырайыаспыт сыанатын ыарахана. Холобур, бу бириэмийэни тута кэлэрбэр биир киһиэхэ билиэт сыаната 52 тыһыынча солкуобайга тэҥнэстэ. Ону ол диэбэккэ, кэргэммин кытары олохпутугар биирдэ буолар бэлиэ күҥҥэ кытта, Ил Дархан илиититтэн бириэмийэ тута кэллибит.
-
0
-
0
-
0
-
0
-
0
-
0
