Бэҕэһээ киэһэ 20:00 ч туругунан, сорох учаастактарга уу таһыма түһүүтэ, сорохторго уу кэлиитэ бэлиэтэммитэ. Ол курдук, Сунтаар улууһугар Кэмпэндээйи, Туойдаах уонна Тэҥкэ суолларын алдьаппыт, Эбээн Бытантай улууһугар Баатагай-Алыытыгар уонна Кустуурга ыаллар олбуордарыгар киирбит уу сыыйа түһэн эрэр эбит. Өлүөнэ өрүскэ турар Өлүөхүмэ Кыыллаах Арыытын ыалларын олбуордарын, оҕуруоттарын, хортуоппуйдарын ылбыт,
– Сыллата кэлэр буолан, ууну кэм бэлэмнээх көрсүбүппүт, арай, уоппут суох. Уу ыаллар тиэргэннэрин, оҕуруоттарын, отун-бурдугун, хортуоппуйун ылла, хата, биир да дьиэ былдьаммата. Бу түүн уу 10-15 сантиметр түспүт, – диэн кэпсээтэ Кыыллаах Арыы баһылыга Александр Макаров биһиги бу сарсыарда быһа сибээһинэн ыйыппыппытыгар.
Оттон Хороҕо кытыы ыаллар хортуоппуйдарын сиригэр киирбит. Антонина Габышева иһитиннэрбитинэн, билигин санаа курдук, ол эбэтэр олус бытааннык түһэ турар эбит. (Хаартыскаҕа Хоро нэһилиэгин дьаһалтатын баһылыга Валерий Иванов түһэриитин көрүҥ).
Хаҥалас улууһугар уу кэлэ турар. Бу сарсыарда сибээстэһэ сылдьыбыппытыгар, II Малдьаҕар нэһилиэгэр уу Улахан Арыы ойооһун ылбытын туһунан эттилэр.
– Уу кэлэн иһэрин истээт, отчуттарбыт рулоннаах отторун үөһэ, куттала суох сиргэ таһаарбыттара, оттон саҥа охсуллубут оппутун былдьаттыбыт. Уу билигин да кэлэ турар, – диэтэ «Бөртө» сылгы собуотун биригэдьиирэ Ульяна Семенова.
Хаартыскалары Антонина Габышева, Ульяна Семенова ыыттылар.
-
0
-
0
-
0
-
0
-
0
-
0
