Уопсастыба

Анал Байыаннай Дьайыы байыастара кыайыы-хотуу эргиллэллэрин туһугар дойду үрдүнэн, ол иһигэр, Сахабыт Сиригэр уҕараабат кыһамньы, болҕомто ууруллар, улахан матырыйалынай, гуманитарнай көмөлөр оҥоһуллаллар. “Саха сирэ эйигин кытары!” волонтердар уопсастыбанай хамсааһыннара киэҥник тэнийэр. Норуоттар сомоҕолоһууларын күнүгэр, сэтинньи 4-гэр, бу күннэргэ бара турар фашизмы утары “Норуот уонна аармыйа -- бииргэлэр!” IV өрөспүүбүлүкэтээҕи пуорумун чэрчитинэн, бэрт сэргэх тэрээһиннэр, түгэннэр буоллулар.

Иистэнньэҥнэргэ Илиҥҥи байыаннай уокурук командующайа генерал-майор Владислав Брюханов кэлэн ыалдьыттаата. Күндү ыалдьыты уонна арыаллааччылары, араас омуктар мааны көстүүмнэрин кэтэн, бырааһынньыктыы симэнэн киэргэммит волонтердар дохсун ытыс тыаһынан истиҥник эҕэрдэлии көрүстүлэр.
Түмсүүлээх үлэ кэлэктиибин аатыттан уруккута Орто Халыма оройуонун сэбиэскэй-бартыыйына үлэһитэ, 77 саастаах волонтер-иистэнньэҥ Иванова Надежда Иннокентьевна эҕэрдэ тыл эттэ, үс тыһыынчаттан тахса араас омук дьоно түмсэннэр, бары аҕам саастаах, бочуоттаах сынньалаҥҥа олорор дьон бэйэлэрин баҕа өттүлэринэн кэлэннэр, сарсыардаттан киэһээҥҥэ диэри тоҕус хайысханан үлэлииллэрин, байыастарга күннээҕи кэтэр таҥастарын-саптарын тигэллэрин, дьыл түөрт кэмин өҥнөрүнэн хахха сиэккэлэри, сахалыы харысхаллары оҥороллорун, үтүө санааларынан, сүрэхтэрин баҕатынан, уоттаах кыргыһыы толоонугар сылдьар биир дойдулаахтарыгар көмөлөһөллөрүн билиһиннэрдэ.

Свердловскайдааҕы инсэниэрдэр үнүстүүттэрин бүтэрэн, Алдан, Нерюнгри бырамыысыланнай оройуоннарыгар үлэлээбит, иистэнньэҥ кэргэнинээн волонтердуур, 79 саастаах Иванов Аркадий Захарович волонтердар барыта 15 туонна матырыйаалы, 18 тыһ. кв.м. хахха буолар сиэккэлэри, чопчу аадырыстаах баһыылкалары, кытыан от, сылгы сиэлэ курдук алгыска туттуллар маллары оҥорон АБДь байыастарыгар ыыппыттарын, байыастар үөрэллэрин, махтаналларын, төрөөбүт-үөскээбит тапталлаах, ахтылҕаннаах Сахаларын Сириттэн кэлэр мал-сал туохха да кэмнэммэт күндүтүн, сүрэхтэригэр, дууһаларыгар тиийэрин билинэллэрин, күүскэ махтаналларын кэпсээтэ.

Илиҥҥи байыаннай уокурук командующайын солбуйааччы, генерал-майор Владислав Брюханов волонтердар истиҥ көрсүһүүлэригэр махтанна: “Передаю вам слова признательности и благодарности за вашу работу и разрешите поздравить с праздником Народного Единства! Приходишь и смотришь на стенах памятные вещи, сувениры, сделанные вашими руками для военнослужащих, это большая радость, это связь с близкими, она придает силы, поддерживает бодрость духа, дает внутреннюю основу для выполнения задач, которая необходима на фронте. Когда мы говорим о военнослужащих, выражаем признательность. Они обеспечены всем необходимым обмундированием, все родное дает внутренние силы, энергию, когда боец знает, что его помнят, тогда он лучше выполняет задачи, легче переносит тяжести несения военной службы. Вы на пенсии и находите время заниматься, когда как можно было заниматься домашними делами, огородом, цветами, воспитывать внуков, охотой, рыбалкой и так далее. И, когда наступило время СВО, и вы как бойцы народного фронта продолжаете работать. Большое вам спасибо и низкий вам поклон!”.
Генерал Владислав Брюханов «Илин» сэбилэниилаах күүстэр бөлөхтөрө командующайа генерал-полковник Петр Болгарев аатыттан РФ Сэбилэниилээх Күүстэрин байыастарыгар бойобуой бэлэмнэрин бөҕөргөтүүгэ көхтөөх уонна сыаналаммат көмөлөрүн иһин Махтал суруктарынан волонтердар Иванов Аркадий Захаровичка, Готовцева Ньургуйаана Прокопьевнаҕа, Иванова Надежда Иннокентьевнаҕа, Иванова Ксения Ивановнаҕа, Иванова Альбина Михайловнаҕа, Стручкова Мария Николаевнаҕа, Никифорова Наталья Семеновнаҕа “Биһи бары бииргэ олус дириҥ суолталаах дьыаланы оҥоробут, духуобунай уонна сиэр-майгы элбэтэбит уонна Ийэ дойдубут куттала суох кэскилин хааччыйабыт!” диэн тылларынан эҕэрдэлээтэ.
Волонтердар “Арахсыбаппыт атын омук диэн”, “Сэрии буолбатын”, “Катюша” ырыалардаах попурри-хуорунан, хаартыскаҕа түһүүлэринэн көрсүһүүнү түмүктээтилэр.
Генерал Брюханов официальнай көрсүһүү кэнниттэн иистэнньэҥнэр хайдах үлэлииллэрин, матырыйааллары, тигиллибит таҥаһы-сабы, бэлэмнэммит баһыылкалары көрдө-иһиттэ, кэпсэттэ, сэҥээрэрин биллэрдэ.

“Бары бииргэ -- Кыайыыга!” девизтээх Саха Өрөспүүбүлүкэтин Координационнай киинин оперативнай ыстаабын уонна Донбасска көмөлөһүү уонна өйөөһүн Хотугу-Илиҥҥи пуондатын салайааччыта Георгий Куркутов санаатын маннык үллэһиннэ: “Норуоттар сомоҕолоһууларын күнүгэр ананан, “Саха Сирэ эйигин кытта!” волонердар түмсүүлэригэр кэпсэтии сыала-соруга волонтердарга болҕомтону уурууга туһаайыллар. Биһиги биир дойдулаахтарбытыгар, сэрии кирбиитигэр сылдьар уолаттарбытыгар өрөспүүбүлүкэ олохтоохторуттан күннэтэ күүс-көмө бара турар. Хас биирдии улуус, нэһилиэк, бөһүөлэк ис сүрэҕиттэн, бэйэтин баҕа санаатынан, тэрийэр дьоҕурунан, баар усулуобуйаҕа көмөнү оҥорорго улахан өҥөлөөх уонна салгыы үлэлииргэ бэлэмнэр. Кадрдар бэйэлэрэ оҥорон таһаараллара, айар дьоҕурдарынан, тус бэйэлэрин бириэмэлэринэн көмөлөһө тураллара олус наадалаах. Бүгүҥҥү ыалдьыппыт Восточнай байыаннай уокурук командующайын солбуйааччы ресурснай хааччыйыыга эппиэттиир. Ол иһин эбии көмөҕө, эбии оҥорон таһаарыыга кини улахан болҕомтотун уурар”.
Волонтерскай хамсааһын салайааччыта Ефимова Анна Николаевна: “Биһиги уопсастыбаннай хамсааһыммытыгар генерал Брюханов кэлэн барбыта түбэспиччэ буолбатах. Билигин буола турар Анал байыаннай дьайыыга дойду бүттүүнэ турунан туран өйүүр, көмөлөһөр. Хас биирдиибитин таарыйар суолтата сүҥкэн. Үлэбитин, тугу гыммыппытын көрдөрдүбүт, кэпсээтибит. Бииргэ сомоҕолоһон үлэлиибит, сахалары, нууччалары, эбээннэри, эбэҥкилэри сэргэ араас омуктар бааллар. Сыал-сорук туруорунан, уолаттарбыт ичигэстик таҥна, аһыы сылдьаллары туһугар кыһаллабыт. Владислав Николаевич сөхтө, махтанна, хайҕаата. Саамай аҕам саастаахпыт 84-дэ. Бары биэнсийэҕэ тахсыбыт дьоммут. АБДь сэриилэһэ сылдьар уолаттарбыт эдьиийдэрэ, ийэлэрэ, эбэлэрэ бааллар. Биир санааҕа кэлэммит, биир сыаллаах-соруктаах үлэлиибит. Игорь Степанов АБДь бэтэрээнэ, сэрии уотун этинэн-хаанынан билбит, бааһырыыны ылан, бу соторутааҕыта эргиллэн кэлэн, үлэлээн эрэр. Туох наадатын билэринэн-көрөрүнэн, консультаан, сүбэһит быһыытынан олус көмөлөөх. Аны иистэнньэҥ эбит. Кээнчэ тигэр. Иистэнньэҥнэрбит кэккэлэрэ хаҥаата. Судургу, борустуой үлэттэн куттаммат. Холобур буолар. Таах сыппакка, көмөлөһөргө бэлэмин көрдөрөр. Күүс-көмө буолуҥ, биһиэхэ. Ыҥырабын, кэлиҥ. Үлэһит илии наада, Бары бииргэ буолуоххайыҥ!”.
Ити күн, эбиэттэн киэһэ “Кыайыы 50 сыла” успуорт дыбарыаһыгар волейболга күрэхтэһии буолла. Генерал Брюханов, успорт миниистирэ Леонид Спиридонов эҕэрдэлээтилэр. Волонтердар эмиэ хамаанда туруораннар, күрэхтэһиигэ кытыннылар. Хамаандаларын туһугар сүргэлэрэ көтөҕүллэн, ирэ-хоро ыарыйдылар. Бэккэ оонньоотулар. Бастакы баартияҕа чорбойо сырыттылар, кыл-мүччү ситтэрдилэр. Туйгун туруктарыгар сылдьар “Росгвардияларга” хоттороннор туораан хааллылар. Балачча эриһэн оонньообуттарыттан астыннылар, дуоһуйдулар.
Хамаанда хапытаана Егор Егорович Неустроев: “Антифашистскай” порум чэрчитинэн хамаанда туруораммыт волейболга кииристибит. Биэс хамаанда кытынна. Хотторбут туораан иһэр. Оскуола оҕолоруттан 2 № успуортоскуола волейболистарыттан саҕалаан устуодьуоннар, АБДь кыттыылаахтара, спортсменнар, 70-н ааспыт аҕам саастаахтар, биһи волонтердар баарбыт. Күүспүтүн-кыахпытын уураммыт оонньоотубут. Сүһүөхпүт үрдүгэр сылдьарбытыттан үөрэбит. Атыттарга холобур көрдөрөбүт. Хара дьайдаах, хаанымсах фашизмы утары норуот уонна аармыйа, омуктар бииргэбит. Үлэ, оонньуу бииргэ тутуллалларыттан генерал астынна. Сөҕөрүн биллэрдэ. Сэрии толоонугар өйөбүл буолар наадалаах тэрээһиннэр буоллулар”.
Норуоттар сомоҕолоһууларын күнэ туһалаахтык, суолталаахтык ааста. Сир ахсын омуктары, норуоттары түмэр дьаһаллар ыытылыннылар, ырыа-тойук, үҥкүү, оһуохай оройдоруттан тутулуннулар. Өрө көтөҕүллүү, үөрүү-көтүү көҕүллэриттэн тутулуннулар. Махтал тыллара дуораһыйдылар, наҕараадалар туттарылыннылар.

Байыастарбытыгар көмө уҕараабат. Кыайыы биһиэнэ буолуоҕа!

Баһылай Посельскай. Ааптар хаарыскаҕа түһэриилэрэ.