Илиҥҥи байыаннай уокурук бэрэстэбиитэлэ майор Ирина Ким быыстапка АБДь байыастарын ыарахан үлэлэрин сырдатарын, үйэтитэрин бэлиэтээтэ.
– Быыстапкаҕа түмүллүбүт биһиги фронтовой худуоһунньуктарбыт, фотографтарбыт, суруналыыстарбыт үлэлэрэ дьиҥнээх баары көрдөрөр устуоруйа матырыйааллара буолаллар, – диэтэ.
Байыаннай фотограф, «Мерф» диэн позывнойдаах Сергей Бордачев 2022-2024 сс. Анал байыаннай дьайыыга хомондоруопкаҕа тиийэ сылдьан хаартыскаҕа түһэрбит, видеоҕа устубут үлэлэригэр Саха Сиринээҕи «Алмаз» СОБР байыастарын туһунан каадырдар эмиэ бааллар.
Илиҥҥи байыаннай уокурук бэрэстэбиитэлэ лейтенант Александр Авдеев быыстапкаҕа эпоха дьиҥнээх туоһата буолар матырыйааллар туруоруллубуттар.
– Ордук болҕомтону Аҕа дойду сэриитигэр Кыайыыга, Аан дойду иккис сэриитэ бүтүүтүгэр анаммыт «Хорсун быһыы туһунан өйдөбүнньүк» диэн экспозицияҕа уурдубут. Онон манна ньиэмэс нацистарын, дьоппуон милитаристарын саалара-саадахтара, маллара-саптара, сибээстэрин тэриллэрэ, наҕараадалара бааллар. Саамай сыаналаах эспэнээппит биһиги судаарыстыбабыт интернационализмын, фашизмы утары хорсун быһыытын көрдөрөр Уһук Илиҥҥи фронт 88-с стрелковай биригээдэтин былааҕа буолар. Бу былааҕы тутаннар, Арассыыйа араас норуоттарын кытары нанаайдар, кэриэйдэр, кытайдар – Уһук Илин олохтоох омуктара бары сэриилэспиттэрэ, – диэтэ.
Бу туһунан Ил Дархан уонна Бырабыыталыстыба пресс-сулууспата суруйар.
Хаартыска: Саргын Скрябин (ЯСИА).
-
0
-
0
-
0
-
0
-
0
-
0
