Кини Аҕа дойду Улуу сэриитэ бүппүт сылыгар, Улуу Кыайыы сылыгар 1945 сыллаахха алтынньы 20 күнүгэр Таатта улууһун Баайаҕатыгар төрөөбүтэ. Мандар Уус саха ураты оһуордарын, ойуутун-бичигин, саха быһаҕын аан дойду билиниитигэр таһаарбыт улахана үтүөлээх, ону барытын кинигэҕэ тиһэн үйэлэргэ үйэтиттэ. Быйыл Саха Өрөспүүбүлүкэтин Судаарыстыбаннаһын күнүн көрсө, балаҕан ыйын 26 күнүгэр Таатта улууһун Баайаҕатыгар Моҕол ураһа үөрүүлээх аһыллыыта буолбутугар, Ил Дархан Айсен Николаев кэргэнинээн Людмила Валерьевналыын анаан-минээн тиийэн кыттыбыттара. Бу бэлиэ түгэҥҥэ Борис Федорович Неустроевка «Саха Өрөспүүбүлүкэтин Бочуоттаах гражданина» диэн бочуоттаах аат иҥэриллибитэ.
Бу ураты ураһаны Мандар Уус иилээн-саҕалаан, үүннээн-тэһииннээн туттарда. Ол туһунан "Урут соҕотох баай туос ураһаны туттарара. Онон бүтүн өрөспүүбүлүкэ уран тарбахтаахтара туруннахпытына, бары көмөлөөн оҥорор инибит”, -- диэн хаһан эрэ Мандар Уус интервьютугар этэн аһарбыт, ол былаана, үйэлээҕи оҥорорго көҕүлээбит тыллара олоххо киирдэ.
Түгэнинэн туһанан, «Ил Түмэн» издательскэй дьиэ кэлэктиибэ саха норуота ытыктыыр, сүгүрүйэр ууһа Борис Федоривиһы 75 сааскын томточчу туолбуккунан итиитик-истиҥник эҕэрдэлиибит! Эн Саха сирэ бигэ туруктаах буоларын, сайдарын туһугар өрүү кыһаллаҕын, саха эдэр ыччата олоххо бары өттүнэн бэлэмнээх буоларыгар былыргы өбүгэлэрбит саҕаттан эҥсиллэр муударай сүбэҕинэн-амаҕынан өрүү көмөлөһөҕүн. Саха норуота эйигинэн киэн туттар. Ытыктабыллаах Борис Федорович, эйиэхэ чэгиэн-чэбдик уһун олоҕу, кэрэни-үтүөнү, бу курдук саха норуотун олоҕо чэчириирин туһугар сүбэ-ама биэрэн, сирдии сылдьаргар баҕарабыт!
"Саха НКИХ" видеота.
Хаартыскалар: Андрей Сорокин (СИА)
-
0
-
0
-
0
-
0
-
0
-
0
