Күндү баһылыктар, өрөспүүбүлүкэ муниципальнай тэриллиилэрин үлэһиттэрэ уонна дьокутааттара!
Саха Өрөспүүбүлүкэтин салалтатын уонна тус бэйэм ааппыттан эһигини дойду үрдүнэн бэлиэтэнэр Олохтоох бэйэни салайыныы күнүнэн эҕэрдэлиибин!
Муниципалитеттарга гражданнары кытта быһаччы үлэлиир былаас сүрүн уорганынан олохтоох бэйэни салайыныы буолар. Эһиги судаарыстыба федеральнай уонна эрэгийиэннээҕи дьаһалларын толорооччу эрэ буолбакка, былааһы нэһилиэнньэни кытта ситимниир сүрүн уорган буолаҕыт. Нэһилиэнньэ олоҕор үтүө уларыйыылар төһө тэтимнээхтик бараллара олохтоох бэйэни салайыныы уорганнарын көхтөөх үлэлэриттэн тутулуктаах.
Бүгүн өрөспүүбүлүкэ былааһа олохтоох бэйэни салайыныы уорганнарын кытары Саха сирин куораттарыгар уонна сэлиэнньэлэригэр дьону саахалланар туруктаах олорор дьиэттэн көһөрүү бырагырааматын далааһыннаахтык олоххо киллэрэр, саҥа дьиэлэри, оскуолалары, уһуйааннары, суоллары, доруобуйа харыстабылын, култуура, успуорт эбийиэктэрин тутар, эрэгийиэн экономическай уонна инвестиционнай кыаҕын улаатыннарарга күүһүн түмэр.
Өрөспүүбүлүкэ олохтоохторо, уопсастыбаннас муниципальнай тэриллиилэри, олорор куораттарын уонна сэлиэнньэлэрин тупсарыыга көхтөөхтүк кытталлар, олорор, үлэлиир нэһилиэнньэлээх пууннарын чэчирии сайдыыта кинилэр көмөлөрө суох кыаллыбатын өйдүүллэр. Муниципалитеттар олохтоохторо бу сыалга федеральнай уонна өрөспүүбүлүкэтээҕи бүддьүөттэн үп ылар инниттэн олохтоох бэйэни салайыныы уорганнарыгар бэйэлэрин этиилэрин киллэрэллэр, нэһилиэктэри тупсаҕай оҥоруу бырайыактарын толкуйдааһыҥҥа кытталлар. Маннык куонкурустарга кыайыы уонна норуот бырайыактарын ситиһиилээхтик олоххо киллэрии – нэһилиэнньэ уонна олохтоох бэйэни салайыныы уорганнарын үлэлэрин биир сүрүн түмүгэ буолар.
Өрөспүүбүлүкэ олохтоох бэйэни салайыныы уорганнарын ытыктабыллаах үлэһиттэрэ!
Олохтоох бэйэни салайыныы уорганнара көдьүүстээхтик үлэлиир эрэ буоллахтарына, өрөспүүбүлүкэ социальнай-экономическай өттүнэн тэтимнээхтик сайдар кыахтаах. Ол эһиги хас биирдиигититтэн тутулуктаах.
Күүспүтүн түмэн туруоруллубут соруктары толоруохпут, өрөспүүбүлүкэ үрдүнэн олох-дьаһах хаачыстыбатын үрдэтиэхпит диэн бигэ эрэллээхпин!
Бүгүҥҥү үөрүүлээх күҥҥэ хотугу кыраайбыт сайдарыгар ураты кылааккыт иһин барҕа махталбын биллэрэбин! Барыгытыгар чэгиэн туругу, этэҥҥэ буолууну уонна төрөөбүт өрөспүүбүлүкэбит чэчирии сайдарыгар туһуламмыт уустук үлэҕитигэр ситиһиилэри баҕарабын!
Саха Өрөспүүбүлүкэтин Ил Дархана А.С. Николаев.
-
0
-
0
-
0
-
0
-
0
-
0
