-РФ Төрүт сокуонугар киирэр көннөрүүлэр туһунан этэр буоллахха, Бэрэсидьиэн В.В. Путин этии быһыытынан киллэрбит уларыйыылара билиҥҥи уустук кэмҥэ дойдуга баар кыһалҕалары быһаарарга туһуламмыттар: нэһилиэнньэ олоҕун таһымын үрдэтии, тастан оҥоһуллар дьайыылартан көмүскэнии, о.д.а. Ол иһин судаарыстыба бэлиитикэтэ социальнай үлэҕэ хайысхатын күүһүрдэр. Онуоха Бэрэсидьиэн уонна Бырабыыталыстыба эппиэтинэстээхтэрэ мэктиэлэнэр. Дойду экэниэмикэтигэр сөптөөх усулуобуйаны тэрийии, аһаҕас былаас тиһигин бигэргэтии уонна дойду суверенитетын күүһүрдүү туһунан Төрүт сокуоҥҥа киирбит уларыйыыларга этиллэр.
Култуураҕа, үөрэххэ, доруобуйа харыстабылыгар, социальнай эйгэлэргэ, тулалыыр эйгэни харыстааһыҥҥа, волонтердар үлэлэригэр, дойдуга бэриниилээх буолууга, урбаанньыттары өйөөһүҥҥэ РФ Бырабыыталыстыбатын боломуочуйата чуолкайданар.
Науканы, научнай-технологическай сайдыыны өйөөһүн Бырабыыталыстыба боломуочуйатынан мэктиэлэнэр буоларыттан мин ордук үөрэбин. Оччотугар экэниэмикэбит наукаҕа тирэҕирэн, итиэннэ үрдүк технологияны туһанан сайдыа этэ.
Парламент суолтата улаатара – кэм ирдэбилэ. Бырабыыталыстыба, ситэриилээх былаас федеральнай уорганнарын чилиэннэрин, судьуйалары Госдуманан уонна Федерация Сэбиэтинэн бигэргэтэр буолаллара -- былаас уонна сокуону оҥорор уорганнар ыкса сибээстээх буолалларыгар төрүөт буолуоҕа.
Бэрэсидьиэҥҥэ, дойду субъектарын салайааччыларыгар, Госдума дьокутааттарыгар, Бырабыыталыстыба чилиэннэригэр, федеральнай судьуйаларга хааччахтар туһунан бу уларыйыыларга суруллубут, ол норуот былааска итэҕэйэр буоларыгар төрүөт буолуоҕа. Судаарыстыбаннай сулууспа соругунан норуот туһугар үлэлээһин буолар.
Онон от ыйын 1 күнүгэр РФ Төрүт сокуонугар киирэр көннөрүүлэр иһин куоластыыргытыгар ыҥырабын.
-
0
-
0
-
0
-
0
-
0
-
0
