- Дойду Бэрэсидьиэнэ Төрүт сокуоҥҥа көннөрүүлэри киллэрэргэ Бүтүн Арассыыйатааҕы куоластааһыны от ыйын 1 күнүгэр ыытарга эппитэ.
Төрүт сокуоҥҥа уларыйыылар киирэллэрин сэргээччилэр да, утарааччылар да бааллар. Оттон мин тус бэйэм Конституцияҕа уларытыылар киирэллэрэ билиҥҥи кэм ирдэбилэ дии саныыбын. Чуолаан социальнай хайысхалаах ыстатыйаларга көннөрүүлэр киирбиттэрин биһирээтим. Холобура, нэһилиэнньэ социальнай көмүскэлэ Төрүт сокуонунан бигэргэнэрэ, хамнас алын кээмэйэ нэһилиэнньэ тиийинэн олоруутун алын кээмэйиттэн намыһах буолбата Төрүт сокуонунан мэктиэлэнэрэ -- кэскиллээх этиилэр.
Аны туран, дьиэ кэргэн, ыал бэлиитикэтигэр улахан болҕомто ууруллубут. Ол курдук, ыал буолууну өйөөһүн, ийэ-аҕа оруолун өрө тутуу, дьиэ кэргэҥҥэ оҕону иитии усулуобуйатын тупсарыы, сааһын сиппит оҕо аҕам саастаах төрөппүттэрин көрүүтэ-истиитэ, оҕо аймах, эдэр ыччат бырааба Конституциянан көмүскэллээх буолуута.
67-с ыстатыйа 4-с чааһыгар "Арассыыйа судаарыстыбаннай бэлиитикэтин сүрүн оҥкула -- оҕо" диэн Төрүт сокуоҥҥа саҥа уларытыы киллэриллибитэ улахан суолталаах. Чахчыта да, инники кэскилбит кэнчээри ыччаппыт буоллаҕа эбээт. Бүгүн оҥоһуллар барыта кинилэр дьоллоох олохторун туһугар туһаайыллар.
Маны таһынан, олохтоох бэйэни салайыныыны күүһүрдэн биэрэргэ, 131-с нүөмэрдээх ыстатыйаҕа сөп түбэһиннэрэн, улуустар, нэһилиэктэр бэйэлэрэ сөпкө дьаһанан, үгүс тутуулары, дьон-сэргэ олоҕо тупсарыгар араас хамсааһыннары ыытар буолууларын сэҥээриэххэ сөп диибин.
Төрүт сокуоҥҥа уларытыылар тустарынан киэҥник бэчээккэ, тэлэбиидэнньэҕэ, араадьыйаҕа сырдаталлар, онон олохтоохтор информацияны истэ-билэ сылдьаллар. От ыйын 1 күнүгэр быыбардыыр учаастакка кэлэн, санааларын этиэхтэригэр саарбахтаабаппын.
Конституцияҕа киирэр көннөрүүлэр судаарыстыба уонна уопсастыба сайдыытыгар үтүө көрдөрүүлэри аҕалыахтара диэн эрэнэбин.
-
0
-
0
-
0
-
0
-
0
-
0
