Ил Түмэн Аҕыйах ахсааннаах хотугу норуоттар уонна Аартыка дьыалаларыгар сис кэмитиэтин бэрэссэдээтэлэ Елена Голомарева ити этиини сэргии истибитин туһунан бэлиэтээтэ:
- Владимир Путин Анал этиитэ дойду сайдыытыгар туһуланна. Тыа хаһаайыстыбатын, үөрэхтээһин, култуура, доруобуйа харыстабылын сайдыытыгар хамсааһын тахсыа.
Төһө да уустук кэмҥэ олордорбут, экэниэмикэ бигэ туруктааҕын, сорох хайысхаларга үүнүү-сайдыы баарын эттэ. Хотугу муора суолунан таһаҕаһы тиэйиини тэтимирдэргэ биэс улууска логистическай кииннэр тутулла тураллар. Уһук хоту табаары тиэйии туһунан сокуон олоххо киирэригэр Саха Сирэ күүскэ үлэлэстэ.
Архангельскайтан табаар Хотугу муустаах байҕалынан Тиксиигэ тиийиэ. Оччотугар тырааныспар ороскуота аччаан, ас-таҥас, табаар көрүҥэ дэлэйиэ, сыаната да чэпчиэн сөп. Сүрүн таһаҕас муора суолунан баран, Аартыка оройуоннарыгар олох таһыма үрдүөҕэ.
Хотугу эргимтэ сайдыыта бырамыысыланнаһы кытта ыкса сибээстээх. Бэрисидьиэн эппитинэн, 3-7 сылга болдьохтоон 500 мөл. солк. диэри 3% бырамыысыланнай ипотека бэриллиэҕэ. Чэпчэтиилээх ипотека оборудование атыылаһарга, бырамыысыланнай кластеры сайыннарарга күүс-көмө буолуоҕа.
-
2
-
0
-
0
-
0
-
0
-
1
