‒ Дойду бэрэсидьиэнин Анал туһаайыытын бары дойду олохтоохторо болҕойон истибит буолуохтааххыт. Маны дьон, норуот сүрдээҕин кэтэспитэ. Кини 1 чаас этиэх оннугар, 2 чаас курдук туһаайда. Анал байыаннай операция төрүөтүн, билиҥҥи экэниэмикэбит туругун уонна инники сайдыыбыт хайдах буолуохтааҕын чопчулаан эттэ.
Ааспыт сыл дойдуга уустугун, элбэх сааҥсыйа киирбитин үрдүнэн, валовай бородууктабыт кээмэйин үүнүүтэ улаханнык түспэтэ. Омук дойдулара ааспыт сыл саҕаланыыта биһиги экэниэмикэбит 25%-тан өссө күүскэ түһүөҕэ диэбиттэрэ. Билигин анаалыс түмүгүнэн 2% түстэ. Инфляция 4-5% буолла, үчүгэй дьылларга даҕаны биһиэхэ оннук буолбат этэ. Аны туран, үлэтэ суох буолуу кээмэйэ – 3,7%. Тыа хаһаайыстыбата бурдугу сүрдээх чуолкайдык үүннэриини холобурдаата – 150 мөл. туоннаҕа тиийдибит. Ол иһигэр, экспортнай тахсыыта – 60 мөл. туонна. Бу хаһан да ситиһиллибэтэх ситиһии. Итинэн сибээстээн биһиги атын дойдулартан тутулуга суох буоларбыт наадатыгар бэйэбит наукабытын, оҥорон таһаарыыбытын сайыннарарга кыах үөскэтиэхпит диэн этиилээҕэ. Ону сөптөөх мэхэньиисимнэри, ньымалары оҥоруохпут диэн этиитэ улахан болҕомтону тарта. Аҕыйах сыллааҕыта инфраструктура бүддьүөт кирэдьиитэ диэн өйдөбүл киирбитэ. Ол аата, кэмиэрчэскэй кирэдьиитэ буолбакка, федеральнай бүддьүөт иһиттэн тахсар кыра бырыһыаннаах, уһун болдьохтоох кирэдьиит. Бу кирэдьиит көмөтүнэн эрэгийиэннэр инфраструктура, тырааныспар өттүгэр кыһалҕаларын быһаарар мэхэньиисими лаппа улаатыннарыахпыт диэтэ. Өлүөнэ муостатын дьылҕата ааспыкка Федерация Сэбиэтин уурааҕар киирбит буоллаҕына, кини аҥаара инфраструктура бүддьүөт кирэдьиитин суотугар оҥоһуллуохтаах. Ону биһиги, Саха Сирин дьоно, улаханнык эрэнэбит, кэтэһэбит.
Дойду Бэрэсидьиэнэ сүрдээх дьоһуннаах этиилэри оҥордо:
- бастакытынан, сэрии сэбин туттууга наар хонтуруолга, хааччахха олорбут буоллахпытына, билигин онтон иҥнибэппит;
- иккиһинэн, Болонскай систиэмэ биһиэхэ дьайбатын туһугар үөрэх систиэмэтигэр бэйэбит уруккуттан үлэлээн кэлбит ситиммитигэр төннөр ньымалары, хайысхалары булуохтаахпыт;
- үсүһүнэн, дойдуга оҥоһуллубут үп дойду иһигэр үлэлиирин туһугар деофшоризация ыытыллыахтаах.
Анал байыаннай эпэрээссийэ саллааттарыгар өйүүр пуонда тэрийиитин туһунан сүрдээх күүстээх этии буолла. Күн бүгүн Арассыыйа дьоно барыта, Путин бэлиэтээбитин курдук, оҕотуттан оҕонньоругар дылы көмөлөһө сатыы олорор. Субъектар, улуустар көмөлөһөллөр. Ол гынан баран, мэхэньиисимэ бытаан. Холобур, өрөспүүбүлүкэбитигэр Ил Дархаммыт Айсен Николаев этиитинэн, маннык кыһалҕалары быһаараары, бүддьүөппүтүгэр резервнэй пуондабытын хас да төгүл улаатыннарбыппыт. Ол ньымата, сокуон нөҥүө эргийэр буолан, малы-салы атыылаһан хаһан тириэрдиэхпитигэр дылы олус уһун бириэмэ барар. Оттон бу пуонда нөҥүө быһаччы түргэнник көмөлөһөр кыахтаныахпыт. Онон бу пуонда оруола сүрдээх улахан.
-
0
-
0
-
0
-
0
-
0
-
0
