- Олунньу 21 күнүгэр Арассыыйа, ону Сэргэ Сахабыт Сирин олохтоохторо Анал этиини долгуйа иһиттибит. Кини бүгүҥҥү күҥҥэ нэһилиэнньэни долгутар сүрүн хайысхаларга тохтоото. Олох-дьаһах уларыйыыта, аан дойдуга балаһыанньа, өйөбүл миэрэлэр таарылыннылар. Анал этиини истэн баран, дойдубутугар ыытыллар бэлиитикэ сүрүн хайсхата олус сөптөөҕүн бэлиэтээтим. Кырдьык, Арассыыйа экэниэмикэ өттүнэн атаҕар кытаанахтык турар. Бырамыысыланнас, тыа хаһаайыстыбата, социальнай эйгэ, о.д.а. салаалар көрдөрүүлэрэ сыллата тупсар. Маныаха саансыйалар улахан охсууну оҥорботулар.
Тус бэйэм тыа хаһаайыстыбатын салаатыгар өр сылларга үлэлээбитим. Билигин социальнай эйгэҕэ уонтан тахса сыл үлэлээбит киһи быһыытынан бэлиэтээтэхпинэ, дьон олоҕо тупсарыгар, үбэ хаҥыырыгар күүстээх, былааннаах үлэ барар. Ыал дьон оҕолоноллоругар араас төлөбүрдэр, чэпчэтиилэр киирэллэр. Үөрэх чааһыгар тупсуу барар, ыччат идэ таларыгар, эдэр ыал атаҕар турарыгар усулуобуйа тэриллэр. Маны тэҥэ, үлэһит киһи хамнаһа тиийинэн олоруу алын кээмэйиттэн үрдүк буолуохтаах диэн сокуон киирбитэ көмө биир хайысхата дии саныыбын. Аны араас биричиинэнэн үлэтэ суох хаалбыт дьону дьарыктаах оҥорууга социальнай хантараактар көдьүүстэрин көрдөрдүлэр. Бэйэ дьыалатын арыйан, дохуот аахсааччы ахсаана Абыйга сыллата элбиир. Доруобуйаларынан хааччахтаах биэнсийэлээхтэр эмиэ ураты социальнай көмүскэллээх буоллулар.
Бу киэҥ хабааннаах үлэ нэһилиэнньэ сомоҕолоһуутуттан тахсар, маны кытары дьон тэҥҥэ төрөөбүт, улааппыт түөлбэлэригэр бэриниилээх буолуу үксүүрэ саарбахтаммат.
Анал байыаннай эпэрээсийэ кыттыылаахтарыгар, бэтэрээннэригэр, кинилэр дьиэ кэргэттэригэр анал пуонда тэриллэрин олус сэргээтим. Хас биирдиилэригэр, кими да көтүппэккэ, аадырыстаах көмө оҥоһуллуоҕа.
Арҕаа дойдулар холбоһон, араас саансыйаларынан дойдубут экэниэмикэтин сарбыйа сатаабыттара табыллыбат. Онтон абаран, информацияннан провокациялары оҥороллор. Сэрии сэбин-сэбиргэлин Украинаҕа биэрэ тураллара кистэл буолбатах. Маныаха Бэрэсидьиэммит көмүскэнэр кыахтаахпытын, араас буолар түбэлтэҕэ эппиэт ыарахан буолуо диэн эттэ.
-
1
-
0
-
0
-
0
-
0
-
1
