Бэҕэһээ, ахсынньы 7 күнүгэр, Федерация Сэбиэтин пленарнай мунньаҕар сенатордар дойду Бэрэсидьиэнин быыбарын күнүн аныыр туһунан уурааҕы ылынна. Судаарыстыба баһылыгын быыбара 2024 с. кулун тутар 17 күнүгэр ыытыллыаҕа. Саҥа Бэрэсидьиэн алта сылга талыллан, 2030 сылга диэри дойдуну салайыаҕа.
Санаттахха, судаарыстыба баһылыгын быыбарын күнүн анааһын туһунан быһаарыыны Федерация Сэбиэтэ ылынар. Сокуон ирдэбилинэн, куоластааһын күнэ ый иккис өрөбүлүгэр ыытыллыахтаах. Куоластааһын күнэ бырааһынньык күнүгэр түбэһэр буоллаҕына, ый аныгыс өрөбүлүгэр көһөрүллэр.
Федерация Сэбиэтэ биир санаанан быыбар күнүн аныыр туһунан уурааҕы биһирээтэ. Парламент үрдүкү балаататын бэрэссэдээтэлэ Валентина Матвиенко этэринэн, бу быһаарыы быыбар иннинээҕи хампаанньа саҕаланыытын биллэрэр. «Бэрэсидьиэн быыбара дойду бэлитиичэскэй олоҕор мэлдьи улахан суолталаах түгэн. Арассыыйа инники сайдыытын кэскилин түстүүр. Кэлэр быыбар, омуннааһына суох, устуоруйаҕа ураты суолталаах», - диэн Матвиенко бэлиэтээтэ.
-
0
-
0
-
0
-
0
-
0
-
0
