CNN ханаал Пенсильвания штатын куоластааһынын дааннайдарыгар олоҕуран итинник түмүгү оҥорбут. Бу штатка Джо Байден 49,7 % куолаһы ылла. Оттон Дональд Трамп – 49,2 % куоласка тигистэ. Онон Пенсильвания Джо Байдеҥҥа быыбардааччы 20 куолаһын биэрдэ. Инньэ гынан, Байден 290 быыбардааччы куолаһын хомуйда диэн буолла. Манна санатан эттэххэ, хандьыдаат кыччаабыта быыбардааччы 270 куолаһын ылыахтаах. Билигин Дональд Трамп быыбардааччы 214 куолаһын эрэ ылан олорор.
“Өрөспүүбүлүкэлии” хайысхалаах Fox News ханаал Пенсильвания уонна Невада штаттара Джо Байдены өйөөбүттэригэр олоҕуран, эмиэ итинник билгэлээһини таһаарда. Ханаал дааннайынан, Джо Байден быыбардааччы 273 куолаһын ылбыт.
СМИ-лэр Джо Байден кыайыытын туһунан суруйан саҕалаабыттарыгар, Джо Байден бэйэтэ твиттерга маннык суруйда: “Эмиэрикэ, миэхэ улуу дойду лиидэринэн талыллыы улахан чиэс буолар. Мин АХШ олохтоохторун барыларын бэрэсидьиэннэринэн буолуоҕум. Ким хайдах куоластаабытыттан тутулуга суох”. Твиттерга Джо Байден номнуо "АХШ Бэрэсидьиэнэ" диэн ыйылла сылдьар.
Бу иннинэ Дональд Трамп “Пенсильванияҕа уонна да атын штаттарга куоластааһын түмүктэрин сокуоннайа суохтук аахпыттарын” туһунан бэйэтин санаатын иһитиннэрбитэ. Онон кыайтарар да түгэнигэр Джо Байден кыайыытын мөккүһэр бигэ санаалааҕын биллэрбитэ.
-
0
-
0
-
0
-
0
-
0
-
0
