Кэмитиэт бэрэссэдээтэлэ Владимир Прокопьев быйылгы Олоҥхо ыһыаҕын, Бороҕон сэлиэнньэтигэр Саха Сирин норуоттарын оонньууларын, о.д.а. суолталаах үгүс тэрээһиннэр ыытыллыбыттарын санатта. Оройуоннарга муниципальнай быыбардар ыытылыннылар уонна саҥа бэрэссэдээтэллэр талылыннылар. Булуҥ оройуонугар улуус дьокутааттарын Сэбиэтин Константин Николаевич Шахурдин салайан үлэлэтэр, Кэбээйигэ – Савва Юрьевич Афанасьев, Өймөкөөҥҥө – Михаил Михайлович Андреев, Усуйаанаҕа - Артем Артемович Милютин.
Дьокуускай куорат Думатын бэрэссэдээтэлэ Альберт Семенов бу күннэргэ өрөспүүбүлүкэ бэрэстэбиитэллээх уорганнара муниципальнай тэриллиилэригэр олохтоох салайыныы бүддьүөттэрин көрбүттэрин уонна ылыммыттарын бэлиэтээтэ.
Саха Сирин Киин быыбардыыр хамыыһыйатын бэрэссэдээтэлэ Евгений Федоров ааһан эрэр сылга Саха Сиригэр ыытыллыбыт быыбардар туһунан кэпсээтэ, ону тэҥэ 2023 сыллааҕы былааны билиһиннэрдэ. Кини эһиил өрөспүүбүлүкэ Ил Дарханын уонна норуот дьокутааттарын быыбардара былааннанарын бэлиэтээтэ. Итиэннэ эрэгийиэннээҕи быыбарга «мобильнай быыбардааччы» саҥа мэхэньиисим суолталааҕын чопчулаата.
Үөһээ Дьааҥы улууһун дьокутааттарын Сэбиэтин бэрэссэдээтэлэ Екатерина Ноговицына эһиил муус устар ыйга биир муниципальнай нэһилиэк баһылыгын боломуочуйатын болдьоҕо бүтэрин иһитиннэрдэ. Бу түбэлтэҕэ хайдах үлэлиэххэ сөбүн туһунан ыйытык биэрдэ: «Баһылык боломуочуйатын болдьоҕун уһатабыт эбэтэр муус устар ыйга быыбар ыытабыт дуо?». Евгений Федоров федеральнай сокуоҥҥа олоҕуран, муниципальнай тэриллии баһылыгын боломуочуйатын болдьоҕо түмүктэннэҕинэ, быыбары аныыр наадатын эттэ.
Салгыы наҕараадалары туттардылар. Софрон Сыранов аатынан «Олохтоох салайыныыга өҥөлөрүн иһин» Ил Түмэн үрдүкү бэлиэтинэн «Бүлүү улууһа (оройуона)» МО дьокутааттарын оройуоннааҕы Сэбиэтин бэрэссэдээтэлэ Гаврил Семенович Корякин уонна «Нерюнгри оройуона» МО дьокутааттарын оройуоннааҕы Сэбиэтин бэрэссэдээтэлэ Валерий Викторович Селин наҕараадаланнылар.
Мунньахха СӨ Уопсастыбаннай палаататын бэрэссэдээтэлин солбуйааччыта, коррупционнай, о.д.а. сокуону кэһиини сэрэтэр салалта бэрэссэдээтэлэ Наталья Кашперская ыччакка патриотическай иитии кыһалҕатын таарыйда. Ыччат этэрээттэригэр дьоруой ааттарын иҥэрэр үтүө үгэһи төнүннэрэргэ этии киллэрдэ.
СӨ Счетнай палаататын бэрэссэдээтэлин солбуйааччыта Елена Рейнбуш дойду субъектарыгар уонна муниципальнай тэриллиилэргэ хонтуруоллуур-счетнай уорганнар үлэлэрин уопсай бириинсиптэрин уонна үлэлэригэр-хамнастарыгар туһааннаах федеральнай сокуоҥҥа саҥа уларыйыылар киирбиттэрин эттэ. Ону сэргэ хонтуруоллуур-счетнай уорганнар үлэлэрин бириинсиптэрэ аһаҕас буолуохтааҕын иһитиннэрдэ. Ол туһуттан «ВКонтакте» социальнай ситим көмөтүнэн тэрилтэ страницатын арыйбыттарын, аһаҕастык иһитиннэриини нэһилиэнньэҕэ тиэрдэр үлэни ыыталларын сырдатта.
СӨ Ил Дарханын уонна Бырабыыталыстыбатын анал бырагыраамаларын управлениетын салайааччыта Андрей Никифоров муниципальнай тэриллиилэр уорганнара олохтоох бүддьүөттэн үп-харчы көрүнэн, анал байыаннай дьайыыны өйүүргэ дьоһун суолталаах үлэни оҥороллорун иһин махтанна. Андрей Васильевич бу көмө миэстэтигэр суһаллык оҥоһулларын бэлиэтээтэ.
Түмүккэ норуот дьокутаата Владимир Прокопьев кэлэр сыл судургута суоҕун, олус улахан соруктар туралларын, ол иһигэр бэлитиичэскэй суолталаах тэрээһиннэр баалларын бэлиэтээтэ. СӨ Ил Дарханын, норуот дьокутааттарын, муниципальнай тэриллиилэр баһылыктарын уонна бэрэстэбиитэллээх уорганнарын дьокутааттарын быыбардара буолуоҕа. Владимир Прокопьев биир идэлээхтэрин үүнэр Саҥа дьылынан эҕэрдэлээтэ уонна туруоруллубут соруктары барытын ситиһиилээхтик быһаарарга баҕарда.
-
0
-
0
-
0
-
0
-
0
-
0
