Бэлиитикэ

Ол иһин төрөөбүт дойдуга бэриниилээх буолууга иитэр-такайар федеральнай сокуон барылын оҥорорго Ил Түмэҥҥэ Михаил Гуляев бэрэссэдээтэллээх оробуочай бөлөх тэриллибитэ. 

Билиҥҥи кэмҥэ бэрт сытыытык турар сокуон барылын торумнуурга олунньу 3 күнүгэр Ил Түмэн ыччакка, физичэскэй култуураҕа уонна успуорка бастайааннай кэмитиэтин мунньаҕа буолан ааста.

Аҕа дойдуга бэриниилээх буолууга өрөспүүбүлүкэ таһымыгар Арассыыйаҕа биир бастакынан тустаах сокуон былырыын муус устар 28 күнүгэр ылыныллыбыта. Михаил Гуляев, Ил Түмэн ыччакка, физичэскэй култуураҕа уонна успуорка бастайааннай кэмитиэт бэрэссэдээтэлэ былырыын ахсынньыга Судаарыстыбаннай Дуума мунньаҕар кыттыбыта.

Кини ити сокуон федеральнай таһымҥа бигэргэнэрэ эрэгийиэннэргэ тустаах үлэни ыытарга наадалааҕын эппитигэр Артем Метелев, ыччат бэлиитикэтигэр Судаарыстыбаннай Дуума кэмитиэтин бэрэссэдээтэлэ: «Этиилэргитин киллэриҥ», — диэбитэ. Ол иһин Ил Түмэн Бэрэссэдээтэлэ Алексей Еремеев дьаһалынан Аҕа дойдуга бэриниилээх дьону иитэн таһаарарга федеральнай сокуон барылын оҥорорго оробуочай бөлөх тэриллибитэ.

Аныгы кэм дьоруойдарын өрө тутуохтаахпыт

«Сокуон федеральнай таһымҥа ылылыннаҕына, судаарыстыбаннай таһымнаах буоллаҕына биирдэ киэҥ хабааннаах үлэ барыан сөп. Бастатан туран, судаарыстыбаттан өйөбүл баар буолуохтаах. Төрөөбүт дойдуга бэриниилээх буолуу сиэрин-майгытын уһуйаантан, оскуолаттан саҕалаан, бары үөрэх кыһаларыгар, тэрилтэлэргэ тарҕатыахтаахпыт.  

Холобур, Сэбиэскэй кэмҥэ бу боппуруоска улахан болҕомто ууруллара, оскуолаҕа байыаннай бэлэмнэниигэ анал уруок баара. Сэриигэ сылдьыбыт бэтэрээннэр, дьоруойдуу хорсун быһыыны оҥорбут тумус туттар дьоммут оскуола оҕолорун кытта көрсөллөрө. Билигин хорсун буолуу уордьанын ылбыт дьоммут ити үтүө үгэһи салҕыахтарын сөп. Кинилэри чиэстиэхтээхпит, киэн туттуохтаахпыт, дьоруой оҥостуохтаахпыт.

Успуорду ылан көрдөххө, эдэр ыччат Олимпийскай чөмпүйүөннэргэ сүгүрүйэр, кинилэр курдук үрдүк кирбиигэ тахсыан баҕарар буолан дьарыктанар. Ол курдук аныгы кэм дьоруойдарын өрө тутуохтаахпыт.

Аҕа дойдуга бэриниилээх буолууга анал киин тэрилиннэҕинэ, анаан-минээн ким эрэ дьарыктаныан наада, былааннаах үлэ ыытыллыахтаах», — диэн санаатын үллэстэр Михаил Гуляев.

Сокуон барылын ырытыһыыга норуодунай дьокутаат Иван Данилов үлэлэһиэн сөптөөх министиэристибэ, биэдэмистибэ элбэх, онон идеологическай үлэҕэ туһунан үбүлээһин наадата суох курдугун ыйда.

Уопсастыбаны бөҕөргөтүү биир көрүҥэ патриотическай иитии буоларын, итиэннэ федеральнай сокуон барылын оҥорорго өрөспүүбүлүкэтээҕи сокуоҥҥа тирэҕирэр оруннааҕын эттэ Андрей Дорогань, Ил Түмэн Мандатнай уонна регламентнай хамыыһыйатын бэрэссэдээтэлэ.

Донбасска сахалары ытыктыыллар

Саха Сириттэн ыҥырыллыбыт саллааттарга уонна Донбасс олохтоохторугар көмөлөһөргө тэриллибит СӨ Суһал штабын, биир кэлим координационнай киинин бэрэстэбиитэлэ Станислав Софронов ааспыт эрэ нэдиэлэҕэ байыаннай эппэрээссийэ буола турар сириттэн кэлбитэ.

«Биһиги анараа биир дойдулаахтарбытыгар күн аайы гуманитарнай көмөнү, таҥас-сап, байыаннай тэрил, уолаттарга аймахтарыттан баһыылка тиэрдэбит. ДНР Кировскай диэн куоратын өрөспүүбүлүкэ бэйэтин шефствотыгар ылан, социальнай эбийиэктэри, суолу-ииһи, ОДьКХ ситимин чөлүгэр түһэрэргэ көмөлөһөр. Кылгас кэмҥэ хаачыстыбалаах үлэ ыытылынна, быйыл ити эмиэ салҕаныа.

Саха саллааттарын туһунан бииргэ сылдьар дьонноро, хамандыырдара үтүө эрэ өттүнэн кэпсииллэр. Сиргэ сылдьар үөрүйэхтэрин, сааны-саадаҕы сатаан тутталларын, сыалы табалларын, бэйэлэрин кыаналларын үрдүктүк сыаналыыллар. Сахалар үксүн штурмовой этэрээккэ, разведкаҕа, пехотаҕа сылдьаллар, снайпердар, спецназтар элбэхтэр. 

Атын эрэгийиэнтэн кэлбит уолаттар сахалары кытта тутуһан сылдьа сатыыллар, биһиги буойуннарбыт бородуукта кэлиитэ уустугурдаҕына, бултаан-алтаан астарын булуналлар. Окуопаҕа, блиндажка хоммуппут, онно киирдэххэ биһиги дьоммут үүтээн иһин курдук оҥостон кэбиспит буолаллар.

Уолаттар күн бүгүн саамай наадыйаллара — байыаннай тэрил: ырааҕы чугаһатар, улаатыннарар үчүгэй оптика, түүн көрөргө анаммыт тэрил, тепловизор, маскировочнай халааттар», — диэн билиһиннэрэр кини.

Манна бэрт сэмэйдик сылдьыбыт уолаттар анараа тиийэн тосту уларыйан, эр киһилии бойобуой ис куттара уһуктан, кыаҕыран-күүһүрэн тахсалларын бэлиэтээтэ.

Станислав Софронов Аҕа дойдуга бэриниилээх дьону иитэн таһаарарга улахан дьону, төрөппүттэри кытта үлэ барыахтааҕын чиҥэтэн эттэ. Сэриигэ буола турар чахчыны нэһилиэнньэ ситэ өйдөөбөтүн, уолаттарын эрэ ыыппыт дьон эттэринэн-хааннарынан билбиттэрин иһитиннэрдэ.

«Онон төрөөбүт дойдубутугар бэриниилээх дьону иитэн таһаарарга судаарыстыба өттүттэн өйөбүл баар буолуохтаах, ити үлэни сүрүннүүр анал кииннэр тэриллиэхтээхтэр», — диэн Михаил Гуляев түмүктээн эттэ.