Мунньахха Ил Түмэн Бэрэссэдээтэлин солбуйааччыта Антонина Григорьева, Ил Түмэн бэйэни салайыныыга сис кэмитиэтин бэрэссэдээтэлэ Владимир Прокопьев, Ил Түмэн наукаҕа, үөрэҕириигэ, култуураҕа, маассабай информация сириэстибэлэригэр уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева кытыннылар.
Алексей Еремеев ньиэп, гаас, чох, көмүс хостооһунугар Саха сиригэр көрдөрүү хайдаҕын, тыа хаһаайыстыбатыгар туох саҥа сүүрээн баарын уонна дьон олоҕор тыын суолталаах сокуоннарга туох уларыйыылар киирбиттэрин кэпсээтэ.
Сүрүн иһитиннэрии кэнниттэн Ньурба улууһун бас-көс дьоно, дьокутааттара уонна урбаанньыттара Ил Түмэн дьокутааттарыгар ыйытыылары биэрдилэр.
Урбаанньыт Алексей Тихонов үүт сыаната 60 солкуобай буоларын тухары, дьоммут сүөһүлэрин эһэ туруохтара диэн бэлиэтээтэ уонна сүөһү иитээччилэр туттарар үүттэрин иһин итинтэн элбэх харчыны ылаллара буоллар диэн баҕа санаатын эттэ.
Алексей Еремеев үүт субсидията 10 солкуобайынан үрдээбитин санатан туран, бүддьүөт биир салаатыгар харчы эбэргэ атынтан көҕүрэтэр наадатын бэлиэтээтэ уонна итинник быһаарыылар ылбычча оҥоһуллубаттарын, үбү быыччыктык кээмэйдээн, суоттаан үллэриллиэхтээҕин эттэ.
Тыа хаһаайыстыбатын департаменын салайааччыта-Ньурба улууһун баһылыгын тыа хаһаайыстыбатыгар солбуйааччыта Леонид Ушканов Саха сиригэр хостонор уматыктар – гааһы, ньиэби – бэйэбит өрөспүүбүлүкэбит иһигэр удамыр сыаналаах буолалларын гына үлэһэрбит буоллар диэн этиитин киллэрдэ.
Ил Түмэн испиикэрэ Алексей Еремеев салайааччыларга ситиһиилээх үлэни-хамнаһы баҕарда уонна тирээн турар боппуруостары бу курдук миэстэтигэр сылдьан дьүүллэһэр улахан туһалааҕын бэлиэтээн эттэ.
-
0
-
0
-
0
-
0
-
0
-
0
