Тэрээһиҥҥэ Ил Түмэн бэйэни салайыныыга сис кэмитиэтин бэрэссэдээтэлэ Владимир Прокопьев, Ил Түмэн наукаҕа, үөрэҕириигэ, култуураҕа, маассабай информация сириэстибэлэригэр уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева, Ил Түмэн Хонтуруоллуур кэмитиэтин бэрэссэдээтэлэ Андрей Николаев кыттыыны ыллылар.
Санатан эттэххэ, бэҕэһээ, олунньу 14 күнүгэр Ил Түмэн дьокутааттара Тойбохой нэһилиэгэр тахсан комбикорм собуотун аһыллыытыгар сырыттылар уонна Сунтаар нэһилиэгэр анал байыаннай операция кыттааччытын дьиэ кэргэнин кытары көрүстүлэр.
Ил Түмэн Бэрэссэдээтэлэ Алексей Еремеев өрөспүүбүлүкэҕэ баар быһыыны-майгыны билиһиннэрдэ. Испиикэр Саха Өрөспүүбүлүкэтигэр экэниэмикэ сүрүн көрдөрүүлэрин туһунан кэпсээтэ. Ол курдук, сир баайын хостооһуҥҥа, сүөһүнү иитиигэ улаатыы баарын уонна Россия экэниэмикэ өттүнэн илин диэки хайыһан эрэрин бэлиэтээтэ. Ону таһынан, Алексей Еремеев федеральнай сокуоннарга соторутааҕыта киирбит уларытыылар ымпыктарын-чымпыктарын быһаарда.
Сунтаар улууһун баһылыга Анатолий Григорьев улуус сайдыытыгар сыһыаннаах боппуруостары иһитиннэрдэ. Кини үөрэх, доруобуйа харыстабыла, култуура, тутуу, гаастааһын эйгэлэригэр туох кыһалҕалар баалларын тоһоҕолоон бэлиэтээтэ.
Ол кэннэ кэмитиэттэр бэрэссэдээтэллэрэ хайысхаларынан олохтоохтор ыйытыыларыгар хоруйдаатылар уонна этиилэрин иһиттилэр.
Алексей Еремеев мунньаҕы түмүктүүрүгэр киирбит этиилэр, ыйытыылар өрөспүүбүлүкэ парылааманын инники үлэтигэр учуоттаныахтара диэн эрэннэрдэ уонна Сунтаар улууһа мэлдьи сайда, аатын ааттата турарыгар баҕа санаатын эттэ.
-
0
-
0
-
0
-
0
-
0
-
0
