«Арассыыйа Федерациятын Бырабыыталыстыбата киллэрбит «Нэһилиэнньэҕэ сыстыганнаах ыарыылартан куттал суох буолуутун туһунан (коронавирус саҥа инфекцията тарҕаныытыгар кэккэ хааччахтыыр дьаһалларга сыһыаннаан)» 17357-8 №-дээх федеральнай сокуон барылыгар Ил Түмэн сыанабылын туһунан» уураах барылыгар иһитиннэриини доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэт бэрэссэдэтэлэ Владимир Чичигинаров оҥордо. Коронавирус тарҕанар кутталлаах кэмигэр уопсастыбаннай сирдэргэ (ас-үөл, күннэтэ туттар табаардар маҕаһыыннарыттан уонна аптекаттан ураты эргиэн кииннэригэр, маассабай-култуурунай дьаһалларга) гражданнар коронавируһу утары быһыы ылбыты биитэр коронавируһунан ыалдьа сылдьыбыты туоһулуур докумуоннаах (QR-кодтаах) сылдьаллара ирдэнэр. Бу нэһилиэнньэни харыстыыр, вакцинаны ылыыны 80 %-ҥа тиэрдэн кэлэктиибинэй иммунитеты үөскэтэр, ыарыы тарҕаныытын бохсор итиэннэ локдауну киллэрбэккэ, дойду экономиката түргэнник өрүттэрин ситиһэр туһугар оҥоһуллар итиэннэ 2022 сыл бэс ыйыгар диэри тутуһуллар дьаһал.
Сис кэмитиэт бэлэмнээбит сыанабылын барылыгар QR-кодтаах сылдьар сирдэри уонна кимнээхтэн чуолаан маннык докумуон ирдэнэрин чопчулуурга, саастарын ситэ илик гражданнары эмиэ учуоттуурга о.д.а. этиллибит.
Санааны атастаһыы бэрт көхтөөх буолла. «Мин бастаан QR-код тырааныспарга киллэриллэрин утарар этим, онтон толкуйдаан көрөн баран, ыарыыны бохсуу биир көдьүүстээх ньыматын быһыытынан сыаналаатым», – диэтэ Павел Ксенофонтов. Елена Голомарева, Алиш Мамедов, Евгений Перфильев, Любовь Явловская сокуон барылын өйүүллэрин биллэрдилэр.
Ол быыһыгар саарбахтааччы, утарааччы эмиэ көһүннэ, Виктор Губарев вакцинаны күүһүнэн биэрэр, быһыы ылбатаҕы үлэтиттэн ууратар сатамматын эттэ. Роза Солнышкина, Софрон Афанасьев, Владимир Богданов өрөспүүбүлүкэҕэ коронавируһунан ыксаллаах быһыы-майгы киллэриллибэтэҕин санатан, утаралларын эттилэр. Түмүккэ дьокутааттар сыанабылы бигэргэтэн Судаарыстыбаннай Дуумаҕа ыытарга, сокуон барылын иккис ааҕыынан өйүүргэ быһаардылар.
-
0
-
0
-
0
-
0
-
0
-
0
