Ѳрѳспүүбүлүкэҕэ барыта 104 «феноллаах дьиэ» баара биллэр: 51 – Дьокуускай к., атыттара — Абый, Анаабыр уонна Кэбээйи улуустарыгар.
«Феноллаах дьиэлэргэ» фенол уонна формальдегид муңутуур сѳптѳѳх концентрацията (ПДК) үрдүгэ бэлиэтэнэр. Бу сүрүннээн 1965-1985 сс. тутуллубут олорор дьиэлэр. Ол кэмңэ тутуу тэтимин түргэтэтээри, фенолформальдегидтаах суурадаhын ордук түргэнник тутарынан, бетоңңа фенолы эбэллэрэ. Онтон сорох дьиэлэргэ итиини тутарга фенольнай-резольнай пенопластар туттуллубуттар.
Фенол уонна формальдегид үрдүк кутталлаах, дьааттаах веществоларга киирсэллэр. Фенол дьиэ салгыныгар муңутуур сѳптѳѳх концентрацията (ПДК) — 0,003 мг/м3. Оттон фенол аhара элбэҕэ киhи доруобуйатын энчирэтэр, онкологическай ыарыыларга тиэрдиэн сѳп. Маннык чахчылар ѳрѳспүүбүлүкэҕэ, чуолаан киин куоракка, бэлиэтэммиттэрин туhунан социальнай ситимнэргэ соторутааҕыта суруйан тураллар.
Саха Сириттэн Судаарыстыбаннай Дума дьокутаата Галина Данчикова бу кыhалҕаны быhаарыыга ылсан үлэлиир.
Олунньу 8 күнүгэр парламеңңа «быраап чааhыгар» бэлэмнэнии кэмигэр Галина Иннокентьевна: «Арассыыйа тутууга Министиэристибэтэ фенол уонна формальдегид муңутуур сѳптѳѳх концентрацията үрдүгүнэн куттал суох буолуутун ирдэбиллэригэр эппиэттээбэт дьиэлэргэ олорор гражданнары кѳhѳрүүгэ Сибиир уонна Уhук Илин эрэгийиэннэригэр федеральнай бүддьүѳттэн субсидиялары биэрэри былаанныыр дуо?» - диэн ыйытыыны РФ тутууга уонна олох-дьаhах-хомунаалынай хаhаайыстыбатын миниистиригэр Ирек Файзуллиңңа биэрдэ.
Чахчыта, бу боппуруоhу быhаара сатаабыттара балачча буолла. «2022 сылга уонна 2023 уонна 2024 сыллар былааннанар кэмнэригэр федеральнай бүддьүѳт туhунан» Госдума Уурааҕар кини Галина Данчикова уонна эмиэ маннык кыhалҕалаах атын эрэгийиэннэр дьокутааттарын туруорсууларынан киллэриллибитэ. Онно туспа пуунунан парламент тутууга уонна олох-дьаhах-хомунаалынай хаhаайыстыбатын Кэмитиэтигэр РФ Бырабыыталыстыбатын кытта бииргэ ѳссѳ ааспыт 2022 сылга РФ сокуоннарыгар уларытыылары киллэрэр наадатын кѳрѳргѳ сорудах быhыытынан бэриллибитэ.
Ол Арассыыйа тутууга министиэристибэтинэн оңоhуллубута. Ол курдук, хаарбах дьиэттэн кѳhѳрүүгэ федеральнай бүддьүѳттэн эрэгийиэннэргэ субсидиялары биэрии Быраабылаларын критерийдэрэ кэңэтиллибиттэрэ. Олорго «феноллаах» диэн ааттанар дьиэлэр эмиэ киллэриллибиттэрэ.
Онон билигин Саха Ѳрѳспүүбүлүкэтин Бырабыыталыстыбата, кэлэр 2024 сылга уонна 2025 уонна 2026 сыллар былааннанар кэмнэригэр федеральнай бүддьүѳт бырайыагын бэлэмнээhин чэрчитинэн, «феноллаах» дьиэлэртэн кѳhѳрүүгэ федеральнай бүддьүѳттэн субсидиялары ылары ситиhэллэрэ хайаан да наадалаах.
Источник: Г.И. Данчикова сайта.
-
1
-
0
-
0
-
0
-
0
-
0
