Доруобуйа

Ол курдук, бу бырайыак киинтэн ыраах сытар Аартыка улуустарыгар олорор дьоңңо дьиэлэригэр-уоттарыгар олорон, миэстэтигэр Дьокуускай куорат быраастарын, специалистарын үрдүк квалифицированнай медицинскэй кѳмѳлѳрүн, консультацияларын ылалларыгар олус табыгастааҕын кѳрдѳрдѳ. Онуоха улуус киинигэр да айанныыр наадата суоҕун кинилэр астына бэлиэтииллэр.

Кырдьыга, бу эргин хаhан да буола илик хабааннаах үлэ ыытыллар.

Олунньу бастакы күннэриттэн саҕаламмыт «мобильнай эмчиттэр» үлэлэрэ-хамнастара билигин хайыы-үйэ 4 Аартыка улуустарын хапта. Билигин кинилэр Орто Халыма, Аллараа Халыма, Уус Дьааңы уонна Абый улуустарыгар биир тэңинэн пациеннары кѳрѳллѳр-истэллэр. Бу күңңэ хас да сүүhүнэн киhи кинилэргэ сылдьан, доруобуйатын туругун бэрэбиэркэлэннэ.

Биригээдэлэр састааптарыгар терапевтартан уонна педиатрдартан ураты специалистар - хирург, эндокринолог, кардиолог, акушер-гинеколог, невролог, оториноларинголог, офтальмолог, пульмонолог уо.д.а. үлэлииллэр. Медиктэр дьону приемнууллар, уопсай клиника анаалыстарын уонна онкомаркердарга, ВПЧ, гепатикка, гормоннарга ИФА анаалыстарын туталлар, кѳрдѳрүүлэринэн инструментальнай-диагностыыр чинчийиилэри (УЗИ, ЭКГ) ыыталлар.

Кѳрүү түмүгэр эмтээhин анаммыт дьонун быраастар Дьокуускайтан олорон, бэйэлэрин бастайааннай диспансернай кэтээн кѳрүүлэригэр ылыахтара. Хойутуу быраастар эмиэ тѳннѳн, кинилэри миэстэтигэр приемнуохтара. Инньэ гынан Аартыка улуустарын олохтоохторо сылы эргиччи специалистар медицинскэй кѳмѳлѳрүнэн хааччыллалларыгар кыах баар буолла.

Бырайыак быhыытынан, эмчиттэр ѳссѳ социальнай медицинскэй ѳңѳлѳрү оңороллор. Холобур, олортон Уус Дьааңы улууhун Депутатскай бѳhүѳлэк олохтоохторугар биир наадалаахтарынан сааҕа кѳңүллэри уонна водительскай бырааптары биэрии буолла.

Улуустарынан ыллахха ордук ыарахан суоллаах-иистээх Абый улууhугар Майыар национальнай нэhилиэгэр үлэлии-хамсыы сылдьар Дьокуускай быраастара олунньу 22 күнүгэр диэри бастааңңы специализированнай медицинскэй кѳмѳнү Кэбэргэнэ, Сыаганнаах, Дьоску, Абый, Киэң-Күѳл, Сутуруоха уонна Белай Гора бѳhүѳлэгин нэhилиэнньэтигэр оңоруохтара.

Уус Дьааңы улууhугар, олунньу 11 күнүнээҕи туругунан, 300 олохтоох кѳрдѳрүммүт. Манна эмчиттэр икки биригээдэлэрэ, араас профиллээх 12 специалист, олунньу 3 күнүттэн уонна олунньу 6 күнүттэн саҕалаан үлэлииллэр, 157 киhини хайыы-үйэ кѳрбүттэр. Олунньу 21 күнүгэр диэри быраастар Хайыр, Уус-Куйга, Сайылык (Силэннээх), Казачье, Аллараа Дьааңы, Тумат, Юкагир уонна Депутатскай олохтоохторун приемнуохтара. Тиийэргэ ыарахан суоллаах-иистээх Юкагир нэhилиэнньэлээх пууңңа «Полярные авиалинии» МИ-8 бѳртѳлүѳтэ кѳтүѳҕэ.

Орто Халыма уонна Аллараа Халыма улуустарыгар олунньу 2 күнүттэн быраастар икки биригээдэлэрэ үлэлиир. Билиңңитэ бу улуустарга холбоон 468 киhи медицинскэй кѳмѳнү ылла.

Кулун тутар ыйга 4 Аартыка улуустарыгар – Үѳhээ Дьааңыга, Эдьигээңңэ, Муомаҕа уонна Аллайыахаҕа тахсыы былааннанар. Муус устар ый бүтэhигэр диэри бары 13 улууhу хабар былааннарын кытта мобильнай биригээдэлэр Ѳрѳспүүбүлүкэтээҕи кииннэрин (РЦМБ) салайааччыта Артем Ксенофонтов үллэстэр.

Источник: СѲ Баhылыгын уонна СѲ Бырабыыталыстыбатын сайта.