СѲ Баhылыгын уонна СѲ Бырабыыталыстыбатын пресс-слуууспата иhитиннэрэринэн, олунньу ыйга маннык кѳмѳнү түѳрт Аартыка улуустарын — Абый, Аллараа Халыма, Орто Халыма уонна Усуйаана 4912 олохтооҕо ылбыт.
Кулун тутар ыйга Дьокуускай куорат эмчиттэрин мобильнай биригээдэлэрэ Аллайыаха, Үѳhээ Дьааҥы, Эдьигээн, Муома уонна Эбээн-Бытантай улуустарын 4809 олохтооҕун, ол иhигэр 3248 улахан дьону уонна 1561 оҕону, кѳрдүлэр.
Саха Сирин доруобуйа харыстабылын министиэристибэтин дааннайдарынан, бу күҥҥэ Үѳhээ Дьааҥы улууhугар, Сайдыы, Оhохтоох, Чѳрүмчэ, Хайыhардаах, Улахан Күѳл, Бѳтѳҥкѳс, Алыhардаах, Үҥкүр, Барылас, Бала, Суордаах, Дулҕалаах, Мачах сс. үлэлээн, специалистар 2020 киhини – 1357 улахан дьону уонна 663 оҕону – кѳрдүлэр. Билигин Томторго уонна Верхоянскайга быраастар икки биригээдэлэрэ үлэлиир. Кулун тутар 27 күнүгэр «мобильнай эмчиттэр» манна нэhилиэнньэлээх пууннары барытын хабан, үлэлэрин түмүктүѳхтэрэ.
Муус устар ый бүтэhигэр диэри Аартыка бары 13 улуустарын нэhилиэнньэтэ специализированнай медицинскэй кѳмѳнѳн хабыллыаҕа.
Чахчыта, бу бырайыак киинтэн ыраах сытар Аартыка улуустарыгар олорор дьоңңо дьиэлэригэр-уоттарыгар олорон, миэстэтигэр Дьокуускай куорат быраастарын, специалистарын үрдүк квалифицированнай медицинскэй кѳмѳлѳрүн, консультацияларын ылалларыгар, салгыы эмтэнэллэригэр олус табыгастааҕын кѳрдѳрдѳ.
Олохтоохтор ыраах кэлэн, айан-сырыы чэпчэкитэ суох усулуобуйатыгар дьон туhа диэн бэриниилээхтик үлэлии-хамсыы сылдьар эмчиттэргэ махталлара улахан.
-
0
-
0
-
0
-
0
-
0
-
0
