Саҥа 2022 сылга киириэхтэн өрөспүүбүүкэ үрдүнэн 23 оҕо төрөөтө. Бүгүн Аммаҕа, Мииринэйгэ уонна киин куоракка (Перинатальнай кииҥҥэ, 1 №-дээх өрөспүүбүлүкэтээҕи балыыһаҕа) 116 ийэни төрүүр дьиэттэн таһаарыы сиэрэ-туома үөрүүлээх быһыыга-майгыга толорулунна. Ийэлэргэ Ил Дархан Айсен Николаев дьаһалынан, өрөспүүбүлүкэ 100 сыллаах үбүлүөйүн чэрчитинэн олохтоммут «Дети столетия» тус сыаллаах хапытаал сэртипикээтэ туттарылынна.
– Бу биһиэхэ барыбытыгар, төрөппүттэргэ да, эмчиттэргэ да, үөрүүлээх сабыытыйа буолар. Бүгүн – өрөспүүбүлүкэ 100 сыллаах үбүлүөйүн бэлиэтиир сылыгар күн сирин көрбүт оҕолору таһаарыы бастакы күнэ. Ким эрэ ийэ буолар дьолу саҥа биллэ, ким эрэ хаһыс да оҕото. Эһиэхэ чэгиэн-чэбдик доруобуйаны баҕарабын, ийэ доруобуйатыттан дьиэ кэргэн доруобуйатын туруга улахан тутулуктаах, – диэтэ ийэлэргэ туһаайан доруобуйа харыстабылын миниистирэ Лена Афанасьева.
Үлэ уонна социальнай сайдыы миниистирэ Иван Алексеев быйылгы сыл Ил Дархан дьаһалынан Ийэ сылынан биллэриллибитин, ол чэрчитинэн дьиэ кэргэни өйөөһүҥҥэ кэккэ дьаһаллар былааннаналларын кэпсээтэ. Ол иһигэр, өрөспүүбүлүкэ 100 сыллаах үбүлүөйүнэн хас биирдии саҥа төрөөбүт оҕоҕо «Дети столетия» тус сыаллаах хапытаал олохтоммутун, биэс уонна онтон элбэх оҕолоох ыалларга дьиэ атыылаһалларыгар көмө көрүллэрин, бас билии нолуогуттан босхолоноллорун, төрөппүт көрүүтэ-истиитэ суох хаалбыт оҕолору иитэр ыалларга көрүллэр үбүлээһин икки төгүл үрдэтиллэрин эттэ.
Санатан эттэххэ, Саха сирэ Уһун Илиҥҥи федеральнай уокурукка оҕо төрөөһүнүгэр бастакы, Арассыыйа үрдүнэн алтыс миэстэҕэ сылдьар. Ааспыт 2021 сылга өрөспүүбүлүкэҕэ 12 024 оҕо – 6145 уол, 5 879 кыыс күн сирин көрбүттэрэ диэн Ил Дархан уонна Бырабыыталыстыба пресс-сулууспата иһитиннэрэр.
Мария Васильева (ЯСИА) хаартыскаҕа түһэриитэ
-
0
-
0
-
0
-
0
-
0
-
0
