Билигин улуус үрдүнэн кэлии от туругун бэрэбиэркэлиир эриэйдэлэр ыытыллаллар. Ол курдук, Чыаппараҕа алта рулон, Бахсыга биэс рулон мөлтөх хаачыстыбалаах от көһүннэ. Санатан эттэххэ, тустаах хаһаайыстыбалар маннык туруктаах от аҕалыллыбытын туһунан олохтоох дьаһалтаҕа даҕаны, тыа хаһаайыстыбатын улуустааҕы управлениетыгар даҕаны биллэрбэккэлэр, роликка устаннар, Интернет ситимигэр таһаарбыт этилэр.
Тыа хаһаайыстыбатын улуустааҕы управлениета мөлтөх оту атыылаабыт тэрилтэлэр хоромньуну төлүүллэригэр үлэлэһэ сылдьар. Оту хааччыйыыга «Лигран» ХЭУо уонна И.Н. Осипов, М.И. Макаров үлэлииллэр. Оту тиэйээччилэри кытары табаары оҥорооччулар бэйэлэрэ дуогабар түһэрсэллэр, от миэстэтигэр тиэрдилиннэҕинэ, тиэйии-таһыы ороскуота толуйуллар. Биир туонна от тиэйиитин ороскуота 30 тыһыынча солкуобай буолар, онон ыраахтан аҕалыллар от бэйэҕэ турар сыаната 35 тыһыынча солкуобайга тиийэр.
Быйыл кыһын Чурапчы улууһугар 12 тыһыынча туонна от, ол иһигэр 6,5 тыһыынча туонна өрөспүүбүлүкэ таһыттан, 5500 туонна атын улуустартан тиэйиллиэхтээх. Бу туһунан улуус дьаһалтатын пресс-киинэ иһитиннэрэр.
-
0
-
0
-
0
-
0
-
0
-
0
