ВЭБ.РФ бөлөх уонна Mail.ru Group дьоҕус уонна орто урбааны өйүүр саҥа бырагырааманы оҥордулар. Бырагыраама бастакы бырайыага “Развивай.рф | Бизнес онлайн” диэн пилотнай бырайыак быһыытынан Уһук Илин уонна Арктика сайдыытын пуондатын (ВЭБ.РФ бөлөх састаабыгар киирэр) көмөтүнэн үлэтин саҕалаата. Саҥа бырайыак Уһук Илиҥҥи уонна Арктика эрэгийиэннэригэр үлэлиир урбаанньыттар биисинэстэрин босхо уонна түргэнник интернет ситимигэр көһөрөллөрүгэр көмөлөһүөхтээх. Бырайыак ВКонтакте уонна маркетплейс базаларыгар оҥоһулунна. Манна, бүгүҥҥү туругунан, 230 мөл. солк инвестиция көрүлүннэ.
Уһук Илиҥҥи федеральнай уокуругу пилотнай бырайыак олоххо киирэригэр алҕас талбатылар. Бу бөдөҥ түөлбэ иһигэр 500 тыһ. кэриҥэ дьоҕус урбаан тэрилтэтэ үлэлиир. Онно 1,4 мөлүйүөн киһи үлэлиир. Онон уорукка урбаан эйгэтэ балысханнык сайдар.
Хааччахтааһын кэмигэр интернет сулууспаларын таба туһанан элбэх урбаанньыт дьыалатын сайыннарда. Үгүс тэрилтэлэр табаардарын интернет эрэ нөҥүө батара сырыттылар. Онон бүгүн онлайн-платформалар урбаан түргэнник чөлүгэр түһэригэр чахчы көмөлөһөр кыахтаахтар. Аны туран, интернекка киирбит урбаанньыт ырыынага биллэ кэҥиир, килийиэнин ахсаана эбиллэр туруктаах.
“Развивай.рф | Бизнес онлайн” бырайыак көмөтүнэн урбаанньыттар ВКонтакте социальнай ситимҥэ босхо биисинэс-сирэй арыйар кыахтаналлар. Ону таһынан эрэкэлээмэлэнэллэригэр уһулуччу элбэх кыаҕы ылаллар. Бырайыак хайдах үлэлиирин ВЭБ.РФ бөлөх уонна Mail.ru Group үлэһиттэрэ сиһилии быһааран биэриэхтэрэ.
Саҥа бырайыакка Уһук Илиҥҥи уонна Арктика эрэгийиэннэрин урбаанньыктара бары киириэхтэрин сөп. Онлайн-биисинэһи саҕалыырга “Развивай.рф” порталга киирэн регистрацияны ааһаллар уонна ВКонтакте туспа сирэй арыйаллар. Ол кэннэ хас биирдии урбаанньыт биисинэс-сирэйин сайыннарарыгар 53 тыһ. солк. көрүллэр. Систиэмэ бэйэтэ хас биирдии саҥа киирбит тэрилтэни уонна хампаанньаны анаалыстыыр, ол кэннэ биисинэһи сайыннарарга сүбэлэри биэрэр уонна килийиэннэр базаларын оҥорор. Бу бырагырааманы туһанан урбаанньыттар аан дойду бары муннугун кытта үлэлиэхтэрин сөп. Онлайн-платформа табаары уонна таһаҕаһы тиэрдэр хампаанньалары бэйэтэ ыйан-кэрдэн биэрэр. Урбаанньыт бэйэтигэр сөптөөх хампаанньаны талан баран салгыы үлэлээбитинэн барар. Хас биирдии урбаанньыт мунаахсыйар боппуруостарыгар бырайыак испэсэлиистэриттэн түүннэри-күнүстэри сүбэ-ама ылыан сөп.
Бырайыак туһунан сиһилии манна киирэн аах
-
0
-
0
-
0
-
0
-
0
-
0
