Тымныы полюстаах, ураты килиимэттээх уонна айылҕалаах Сахабыт Сирэ дойду киин куоратын олохтоохторугар уонна ыалдьыттарыгар улахан интэриэһи үөскэттэ. Саха Сирин экспозициятын, ону тэҥэ ВДНХ-ҕа атын павильоннарыгар бастакы 9 күн иһигэр 160 тыһ. тахса киһини түмтэ. Тэрийээччилэр ааҕалларынан, ааспыт өрөбүлгэ Саха Сирин былаһааккаларыгар 45 тыһ. кэриҥэ киһи сырытта. Сүрүн былаһаакка — 75 №-дээх павильон.
Дойду креативнай эрэгийиэнэ
Сэтинньи 13 күнүгэр ыалдьыттар уонна быыстапканы көрөөччүлэр СӨ Ил Дархана Айсен Николаев этиитин сэргии иһиттилэр. Айсен Сергеевич дириҥ ис хоһоонноох этиитигэр хотугу эрэгийиэн олоҕун-дьаһаҕын, төрүт култууратын, айар-тутар үлэһит дьонун, инники кэскилин уонна киэҥ далааһыннаах бырайыактарын туһунан кэпсээтэ.
- Саха Сирэ – үйэлээх төрүт үгэстэр аныгы технологиялары кытары дьүөрэлэһэр уһулуччулаах ураты сир. Саха Сирэ ийэ дойдуга экэниэмикэ тирэҕин быһыытынан рекордка таҕыста. Ол курдук, өрөспүүбүлүкэ баалабай эрэгийиэннээҕи бородууктата 2018 сылтан икки төгүл улаатта – 900 млрдтан 2 трлн солк. диэри. Биэс сыл устата экэниэмикэҕэ 2 трлн инвестицияны тарта. Бэһис сылын субуруччу кыһыл көмүһү, ньиэби, таас чоҕу уонна гааһы хостооһун муҥутуур үрдээтэ. Биһиэхэ тахсар сөҕүмэр уларыйыылар тустарынан этэрбэр, Саха Сирин туһунан урукку өйдөбүлбүтүттэн олус ыраах барарбыт туһунан этэбин. Билигин биһиги билии экэниэмикэтигэр, киһи хапытаалын олоххо киллэрии үйэтигэр үктэннибит. Саха Сирэ дойду саамай «цифровой» уонна креативнай эрэгийиэнэ. Уһук Илин ИТ-бородууксуйатын экспорын 90 бырыһыанын хааччыйар, өрөспүүбүлүкэ оонньуулары айан таһаарааччыларынан, геймдев-хампаанньаларынан аатырар. Арассыыйаҕа киинэни оҥорууга атын киин куораттар кэннилэриттэн үһүс миэстэлээх. Арассыыйа саамай норуодунай эпоһа – саха норуотун Олоҥхото. Түөрт үйэ тухары улуу Арассыыйаны кытта биир дьылҕалаах. Байыаннай дьайыы саҕаланыаҕыттан Саха Сирин буойуттара Ийэ дойдуларын көмүскүү туруммуттара. Саха Сирин түөрт олохтооҕо – Александр Колесов, Алексей Неустроев, Филипп Евсеев уонна Дмитрий Егоров Арассыыйа Бэрэсидьиэнин Ыйааҕынан Арассыыйа Дьоруойа буоллулар. Саха Сирэ – тыһыынчанан сыллаах үтүө үгэстэри илдьэ сылдьааччы уонна ааспыты, билиҥҥи уонна кэлэр кэми түмээччи. Төрөөбүт дойдубут туһугар киэн туттуу, норуоппут туһугар барыбытын түмэр уонна Улуу Арассыыйабыт инникитигэр эрэли саҕар, - диэтэ Айсен Николаев.
«Дьоһун көрдөрүү»
СӨ парламенын бастакы вице-спикерэ Александр Жирков пуорум-быыстапкаҕа Саха Сирин деловой, култуурунай бырагыраамаларын уонна бырайыактарын билиһиннэриитигэр кыттыыны ылла. Өрөспүүбүлүкэ күннэрин чэрчитинэн Александр Жирков РФ Федеральнай Сэбиэтин бэрэссэдээтэлин солбуйааччыта Константин Косачевы, Госдумаҕа Уһук Илин уонна Аартыка сайдыытын кэмитиэтин бэрэссэдээтэлэ Николай Харитоновы, Ыксаллаах уонна Боломуочуйалаах посол ЮНЕСКО дьыалаларыгар хамыыһыйатын эппиэттээх сэкирэтээрэ, тас дойдулар дьыалаларыгар миниистири солбуйааччы Григорий Орджоникидзены, уо.д.а. көрүстэ.
Саха уруута
Саха Сирэ биир бастакынан уруу сиэрин-туомун көрдөрбүтүн, тыһыынчанан көрөөччү сэҥээрдэ. Киинэ, тыйаатыр артыыската Жанна Ксенофонтова уонна режиссер Владислав Федоров урууларын сахалыы сиэринэн-туомунан ыыттылар. Сыанаҕа Олоҥхо тыйаатырын артыыстара кийиит кыыһы таҥыннарыы уонна алгыс сиэрин-туомун толордулар. Үөрүүлээх тэрээһини маассабай оһуокай түмүктээтэ.
Киинэ бэстибээлэ
НХСБ оҕолорго аналлаах түөрт анимация бырайыагын уонна икки аатырбыт киинэни көрдөрдүлэр. Wink («Мир цифры») киинэ-тыйаатырын-лекторийыгар «Туундара» устуудьуйа «Тымныы оҕуһа» лиэнтэтин билистилэр. Киинэ Startup Village 2023 уонна Торонтоҕа imagineNATIVE Film and Media Arts Festival киинэ бэстибээлигэр кыттыбыта. Wink-кэ «Рядовой Чээрин» уонна Любовь Борисова «Мин үрдүбэр күн киирбэт» киинэлэри көрдөрдүлэр.
Үөрэх марафона
Өрөспүүбүлүкэ ураты килиимэтин туһунан үөрэх марафона буолла. «Билии» Арассыыйатааҕы уопсастыба аан дойду таһымнаах научнай-үөрэҕирии киинэ «Хотугу сир: туруктаах сайдыы территорията» диэн лиэксийэлэри тэрийдэ. Марафон кэмигэр эдэр учуонай Никита Тананаев научнай-популярнай ток-шоу көрүҥүнэн Саха Сирин ураты килиимэтин туһунан кэпсээтэ уонна көхтөөх кыттааччыларга бэлэх тутарда. Зоя Стрекаловская уонна Диана Петухова «Олоҥхо аныгы толорооччута – үгэһи харыстааччы» диэн темаҕа семинар- практикум ыыттылар.
Дьаарбаҥка
Саха Сирин гастрономическай бырагырааматын Татьяна Тымырова бэрэссэдээтэллээх «Ассоциация гостеприимства РС(Я)» түмсүү билиһиннэрэр. Манна өрөспүүбүлүкэ биллэр ресторатордара, асчыттара «Атласовтар уһаайбаларыттан» Николай, Валерия Атласовтар, «Махтал», «Аврора» рестораннордаах Иннокентий, Нюргустана Лукиннар, «Тыгын Дархан» ресторан шеф-асчыта Семен Тарбахов уонна церемониймейстер Туйаара-Кучу, Александр Григорьевтар кытталлар.
-
0
-
0
-
0
-
0
-
0
-
0
