Бэс 29 күнүттэн от ыйын 2 күнүгэр диэри Суорун Омоллоон аатынан Опера уонна балет судаарыстыбаннай тыйаатыгар Арассыыйа уонна Саха Өрөспүүбүлүкэтин норуодунай артыыската, П.И. Чайковскай аатынан вокалистар аан дойдутааҕы куонкурустарын лауреата Айталина Адамоваҕа анаммыт опера эдэр ырыаһыттарын аан дойдутааҕы куонкуруһа ыытыллыбыта. Арассыыйаттан, Монголияттан, Кытайтан, Белоруссияттан, Францияттан барыта 23 эдэр ырыаһыт кыттыбыта. Саха Сириттэн аан дойду оператын сыанатыгар саҥа сулус умайбыта. Ол курдук, опера эдэр ырыаһыта Екатерина Корякина Гран-при хаһаайынын үрдүк аатын ылбыта. Иккис сулуһунан Екатерина Захарова ааттаммыта.
Алтынньы 5-6 күнүгэр тыйаатыр саҥа 56-с сезонун Италия улуу композитора Джузеппе Верди «Риголетто» оператынан арыйбыта саха оператын инники сайдыытыгар улахан хардыыны оҥордо. Үс ый кэнниттэн аан бастаан орто үйэҕэ буолбут түгэни опера тыйаатырын артыыстара партияларын төрүт тылынан итэҕэтиилээхтик толорон көрөөччүлэр биһирэбиллэрин ыллылар. Риголетто партиятын аатырбыт опера ырыаһыта Александр Емельянов арылхайдык көрдөрбүтэ.
Оттон чаҕылхай умнуллубат партияны эдэр ырыаһыт Екатерина Захарова аан бастакынан толорон, опера ырыаһытын быһыытынан чахчы даҕаны муҥура суох талааннааҕын көрдөрдө. Екатерина кэрэ, ол гынан баран күүстээх куолаһа нарыннык иһиллэн көрөөччүлэри итиэннэ ыалдьыттары сөхтөрбүтэ. Премьера кэнниттэн режиссер Михаил Панджавидзе: «Гениально!Джильда-уни!» – диэбитинэн, эдэр ырыаһыт иннигэр бокулуоннаабыта. Аатырбыт режиссер айаннаары туран: «Тыйаатыр үлэтиттэн сүдү дуоһуйууну ылан баран эрэбин», -- диэн билиниитэ, бу улахан сыанабыл буолар.
Дьэ, ити курдук, Саха Сирин оператын ускуустубатыгар Аан дойдуга биллэр өссө биир саҥа аат баар буолла. Аан дойдутааҕы Опера күнүнэн Екатерина Захарованы эҕэрдэлээн туран, үрдүктэн үрдүк, чаҕылхай ситиһиилэри баҕарабыт!
Кристина Новгородова хаартыскаҕа түһэриитэ
-
5
-
0
-
0
-
0
-
0
-
0
