«Күн оһуохайа» ѳрѳспүүбүлүкэтээҕи куонкурус СѲ Бырабыыталыстыбатын Бэрэссэдээтэлин солбуйааччыта Сергей Местников, СѲ үѳрэхтээһиҥҥэ уонна наукаҕа министиэристибэтин, СѲ култуура уонна духуобунай сайдыы министиэристибэтин уонна «Саха» НКИХ ѳйѳбүллэринэн ыытылынна. Бырайыак ааптара - Үѳһээ Бүлүү «Олоҥхо оскуолатын» салайааччыта Айталина Мойтохонова.
Куонкурус олунньу 13 күнүгэр Дьокуускай к. «Сосновый бор» кииҥҥэ саҕаламмыта. Манна барыта 110 оҕо уонтан тахса улуустан уонна Дьокуускай к. кытынна.
Култуура уонна духуобунай сайдыы министиэристибэтин пресс-киинэ иһитиннэрбитинэн, кыттааччылар биэс талар түһүмэҕи ааһан, 10 бастыҥ эдэр оһуохай этээччи билиннэ. Уопсай түмүк олунньу 25 күнүгэр таһаарылынна.
«Күн оһуохайа» ѳрѳспүүбүлүкэтээҕи куонкурус кыайыылааҕынан Үѳһээ Бүлүү улууһуттан Алиса Иванова ааттанна уонна 100 тыһ. солк. суумалаах сертификатынан наҕараадаланна.
Кѳрѳѳччүлэр биһирэбиллэрин Юрий Борисов ылла, киниэхэ 50 тыһ. солк. суумалаах сертификат туттарылынна.
«Кэскиллээх этээччи» номинацияҕа Ньурба улууһуттан Сайаана Егорова кыайда уонна 20 тыһ. солк. суумалаах сертификаты ылла.
Ону таһынан 15 тыһ. солк. суумалаах сертификаттарынан Уус Алдан улууһуттан Алеша Бурнашев уонна Үѳһээ Бүлүү улууһуттан Камилла Степанова бэлиэтэннилэр.
-
0
-
0
-
0
-
0
-
0
-
0
