Култуура

«Үгэс курдук айар дьылбытын дьон биһирэбилин ылбыт, «классическай» дэнэр айымньыларбытынан саҕалыыбыт», – диэн кэпсиир тыйаатыр менеджерэ Туйаара Петухова. Кырдьык, саха тыйаатырын «Манчаарыта» (В.В. Никифоров – Күлүмнүүр), «Тиэтэйбитэ» (Н.Д.Неустроев), «Кээрэкээн Ойууна» (П.А. Ойуунускай),  «Төлкөтө» (Н.Г.Золотарев – Николай Якутскай) көрөөччүнү куруук сөхтөрөр, эргийэн кэлэн саҥалыы толкуйга сирдиир бастыҥ айымньылар кэккэлэригэр киирэллэр.

«Быйылгы сылга саҥа испэктээкиллэр эмиэ баар буолуохтара. Тыйаатыр уус-уран салалтата ордук Былатыан Ойуунускай айымньыларыгар болҕомтотун уурар былааннаах», – диэн чопчулуур тыйаатыр бэрэстэбиитэлэ. Маны таһынан испэктээкиллэри телевидение форматынан устан, көрөөччү киэҥ араҥатыгар билиһиннэрэр санаалаахтар. Холобур, сотору кэминэн «Тимир Баасса» диэн Максим Горькай айымньытынан (туруорааччы режиссер Сергей Потапов) телеиспэктээк тахсаары турар эбит. Бу иннигэр Адрей Борисов туруорбут «Илиир Хоруол» испэктээкилин устубуттар.

«Коронавирус дьаҥа хааччахтаабыт кэмигэр атын ньымалары тобула сатыыбыт. Хаачыстыбалаахтык, бары ирдэбиллэри тутуһан уһуллахха, дьон тэлэбиисэр да нөҥүө сэргиир кыахтаах», – диэн бэлиэтиир менеджер Туйаара Петухова.

Ол эрэн тыыннаах оонньуу абылаҥын, тыйаатыр алыптаах эйгэтин биһирээччилэр аҕыйаҕа суохтар. Саҥа айар дылы күүтэн, балаҕан ыйынааҕы испэктээкиллэргэ кэлээри, оҥосто сылдьар буолуохтаахтар. Тыйаатыр үлэһиттэрэ кэпсииллэринэн, саала 408 миэстэтиттэн аҥарын эрэ толоруохтара. Көрөөччүлэр бэрчээккэ, мааска кэтэн киириэхтэрэ. «Ыалдьыттарбыт температураларын кэмнээһин, сааланы-көрүдүөрү салгылатыы, дезинфекциялыыр лаампалары холбооһун күннээҕи дьарыкпыт буолла», – диэн тыйаатыр үлэһиттэрэ кэпсииллэр.

Ирдэбил сымныар диэри оскуола оҕолоро кылааһынан, онтон устудьуоннар бөлөхтөрүнэн кэлэллэрэ бобуллубут. Биирдиилээн, эбэтэр дьиэ кэргэнинээн сылдьыахтарын син. Үчүгэйэ диэн устудьуоннарга, элбэх оҕолоохторго уонна бэтэрээннэргэ 10-нуу %-наах чэпчэтии оннунан хаалбыт. Маны таһынан, дуогабар быһыытынан, тыйаатыр салалтата доруобуйатынан хааччахтаах дьоҥҥо, оҕолорго испэктээкил аайы босхо билиэти көрөр эбит.

Испэктээкил билиэтин сыаната эмиэ уруккутунан хаалбыт: 300-500 солкуобай. Маныаха каассаттан эрэ буолбакка, тыйаатыр сайтыгар «sakhatheatre.ru» эбэтэр «afisha.ykt.ru» порталга киирэн, электроннай ньыманан билиэттэри атыылаһыахха сөп.

Ыйытыылар эбэтэр чопчулаһыылар баар буоллахтарына 8(4112) 34-13-31 эбэтэр 8(968)150-56-02 нүөмэрдэринэн каассаҕа эрийиҥ. Каасса сарсыарда 10:00 киэһээ 18:00 чааска диэри үлэлиир. Испэктээкиллэр бары киэһээ 18:00 чаастан саҕаланаллар.