Тоҕус ый томороон тымныылаах, ирбэт тоҥноох Саха Сиригэр кэрэчээн бэйэлээх сибэккибит ыам ыйын ортото толоону биир гына сириэдийэ тыллар.
Ол эрээри быйыл эрдэлээбит быһыылаах, сорох ыал тэлгэһэтигэр номнуо ньургуһуннар тахсан эрэллэр эбит. Мэҥэ Хаҥалас Балыктааҕар олорор уопсастыбаннай кэрэспэдьиэммит Мария Захарова тиэргэнигэр быкпыттар.
--Саас аайы, хаар уулларын кытары, ким бастакы ньургуһуну булбута-көрбүтэ кэпсээн буолааччы. Биэс сыллааҕыта мин ньургуһуну түөрэн аҕалан, дьиэм илин өттүгэр олордубутум.
Хаар уулунна да, болчуохтара көстөн, улаатан, сибэккитэ быгарын кэтиибин. Сыл аайы эбиллэн иһэллэрэ киһини үөрдэр. Оҕолорбор-аймахтарбар хаартыскаҕа түһэрэн, бастакы ньургуһуну көрөн астынабыт-үөрэбит!
Быйыл эмиэ номнуо быган эрэллэрин көрөммүн үөрдүм, арыый эрдэлээбит курдук. Сандал саас илдьиттэрэ нарын-намчы ньургуһуннар тоҥ буору тобулу үүнэн тахсан эрэллэрэ сүргэбитин көтөхтүлэр, сүрэхпитин үөртүлэр, -- диэн кэрэхсэбиллээх сонунун Мария Захарова сэһэргиир.
Начаас үүнүөхтэрин, аны бүгүн хаар түстэ. Эрдэлээбит диэн үөрбүппүт, айылҕа бэйэтин быраабылатын кэспэт, күүһүн сүтэрбэт эбит...
- 2
- 0
- 0
- 0
- 0
- 0