Ол эрээри быйыл киин куорат Ленин проспега өрөмүөҥҥэ турар буолан, параат ханан хайдах буоларын билиэн баҕалаах элбэх.
Маныаха парааты тэрийиигэ эппиэтинэстээх дьон быһа эпииргэ бу курдук быһааран кэпсээтилэр.
Саха Өрөспүүбүлүкэтин идэлээх сойуустарын федерациятын бэрэссэдээтэлин солбуйааччы Валентина Кириллина:
--Сыл аайы параакка анал тосхоллоох буолабыт. Быйылгы девизпит билиҥҥи балаһыанньанан “За Мир! За труд! За Май!” диэн. Ол аата Эйэ, Үлэ, Маай туһугар түмсэбит. Ону таһынан социальнай ис хоһоонноох былакааттарбытын, транспараннарбытын эмиэ тутабыт: “Үлэһит олорор усулуобуйата үчүгэй буолуохтаах”, “Үлэһит киһиэхэ үчүгэй хамнаһы!”, о.д.а.
Сыл аайы тэрилтэлэр наһаа үчүгэйдик оҥостон кэлэллэр. Ол иһин 2015 сылтан ыла куорат дьаһалтатын кытары саамай сиэдэрэйдик, уратытык, харахха тута быраҕыллар гына киэргэммит колонналарга бириис биэрэр буолбуппут. Быйыл мээрийэ Саха АССР тэриллибитэ 100 уонна Дьокуускай куорат төрүттэммитэ 390 сылларынан эбии икки номинацияны олохтоото. Онон кытаатыҥ, үчүгэйдик бэлэмнэниҥ!
Дьокуускай куорат дьаһалтатын култуураҕа управлениетын исписэлииһэ Пелагия Левина:
- Параат Киров аатынан уулуссаҕа буолар. Киин трибуна Оҕо дыбарыаһын иннигэр туруоҕа. Сыана, экран баар буолуо. “Саха” НКИХ тэлэбиидэнньэнэн быһа көрдөрө туруоҕа.
Көрдөһүүлээхпин: тэрилтэҕит аатын улаханнык суруйан кэлээриҥ, ыытааччылар кимнээх ааһан эрэллэрин көрөн, чопчу этэн иһэллэрин курдук.
Быйыл хаамар сирбит кыараҕаһынан уонна кылгаһынан, тэрилтэлэр бииртэн элбэх көлөнү киллэрбэттэр. Урут, холобура, аҥаардас “Мэри Кэй” 10-ча массыынаны субурутара. Киэргэтиллибит тиэхиньикэ сиртэн 3,5 миэтэрэттэн үрдүгэ суох буолара ирдэнэр. Онтон улаханнары көҥүллээбэттэр. Массыыналар техосмотру барыахтаахтар, “пропуск” ылыахтаахтар, сэрэхтээх буолуу быраабылатын тутуһуохтаахтар.
Киров уулуссатыгар сырыы сарсыарда 8 чааска тохтуур. Онон тэрилтэлэр массыыналаргытын эрдэ кэлэн туруоруоххутун наада. Көрөөччүлэргэ табыгастаах буоларын туһугар суол икки өттүттэн сабыллыаҕа.
Парааппыт 11 чаастан саҕаланар. Онтон 14.00 ч. Хомсомуол болуоссатыгар кэнсиэр, оҕолорго көр-нар, атыы-эргиэн тэриллиэҕэ.
Элбэҕи күн-дьыл туруга быһаарар. Ардах-хаар түспэтэ буоллар. Барыгытын кэтэһиилээх парааппытыгар күүтэбит.
-
3
-
0
-
0
-
0
-
0
-
0
