Этэҥҥэ олордоххо, кэм хардыытын уталыйбат сокуонунан бириэмэ биллибэккэ хаалла. Күн сарсын үтүөкэн күн үүнүө, 100 сылбыт томточчу туолуо.
Хатаспытыгар былааннаммыт, барыбытыгар туһуламмыт тэрээһиннэри таһынан, хас биирдии тэрилтэ бэйэтэ эмиэ туспа ыытта. Олортон быһа тардан кэпсээтэххэ, П.Н. уонна Н.Е. Самсоновтар ааттарынан Хатас оскуолата бүгүн 100 киһилээх күргүөм ырыаны ньиргиттэ, бэҕэһээ эмиэ бу кэлэктиип эр дьонун ансаамбыла М.Н. Жирков музыкатыгар “Сахам сирэ барахсан” диэн саха дууһалаах бары сүрэххэ, дууһаҕа чугастык ылынар ырыатыгар “Тускул” КК кытта бииргэ үлэлэһэн, клип оҥорон таһаардылар, Сахабыт сирин киэҥ киэлитин устун куйаар нөҥүө ыыттылар. М.Жирков быйыл төрөөбүтэ 130 сыла. Ырыа аранжировкатын ырыа туһугар туһуламмыт үгүс элбэх үлэни ыыппыт, ыыта сылдьар Өлөксөй Луҥха оҥорбута уонна бу ансаамбылы кытта ыкса сибээстээхтик үлэлиир.
Хатастааҕы “Ситим” айымньы дьиэтин кэлэктиибэ бу күннэргэ төлөннөөх М.Аммосов төрөөбүт төрүт дойдутугар - Хатырыкка -- автопробег тэрийдэ.
Бары биир тэрилтэ дьоно буолалларын биллэрэн, анал көстүүмнээх, анал былаахтардаах (өрөспүүбүлүкэ, куорат, Хатас), анал бырагыраамалаах, болдьоспут көрсүһүүлээх тэрээһин буолла.
Элбэҕи биллилэр, көрдүлэр, бэйэлэригэр саҥаны, сонуну арыйдылар. Саха дьонун сиэринэн, өттүк харалаах, кэһиилээх баран, бэлэх-туһах туттардылар, бэйэлэрин кэпсээтилэр. Кэлэр көлүөнэ ыччаты дойдуга бэриниилээх буолууга иитиигэ икки өттүттэн бииргэ үлэлэһиэх буоллулар.
Наталья Руфова,
Хатас.
-
2
-
0
-
0
-
0
-
0
-
0
