Ону таһынан сылгы ииттэн, сибиинньэ тутан, оҕуруот аһын үүннэрэн, кэргэнинээн, олохтоох ФАП биэлсэрэ Надежда Николаевналыын ньир-бааччы олорор тыа ыала буолаллар. Сайын аайы республика араас муннуктарыгар үлэлиир-хамсыыр оҕолоро от кэмигэр кэлэн көмөлөһөллөр.
Дмитрий Трофимович аҕыйах сыллааҕыта Хаҥалас улууһун “Бөртө” бааһынай хаһаайыстыбатыттан хаан уларытыытыгар атыыр атыылаһан аҕалбыта, быйыл үөрүттэн үчүгэй төрүөҕү ылла.
Исидор Бараахап аатынан сопхуос Балаҕаннаах отделениетыгар от звенотун салайан үлэлэтэр эрдэҕинэ, от бириэмэтигэр 1000 тахса тонна оту оттоон, туттаран, Александр Артемьев (Амма), Владимир Дмитриев (Ньурба) кэннилэриттэн республика отчут звеноларын күрэҕэр Дмитрий Прокопьев III миэстэ буола сылдьыбыта.
Кини сылын аайы нэһилиэккэ бастакынан окко киирэр, эрдэ бүтэр үлэһит киһи буоларын бары билэбит. Быйыл даҕаны Чөҥкөчөк диэн оттуур сиригэр уола Егор Прокопьевтыын балайда киэҥ сири кытай тыраахтарынан охсон нэлэһитэ сырыттахтарына, Тыа хаһаайыстыбатын специалиһа Саргылаана Степановалыын тиийэн көрүстүбүт.
Дмитрий Трофимович: “От үүнүүтэ үчүгэй, онон киһи санаата көтөҕүллэр”, -- диэн үөрэ-көтө санаатын үллэһиннэ.
-
7
-
0
-
0
-
0
-
0
-
0
