Бу кинигэни Олоҥхо киинин научнай-методическай үлэҕэ салайааччыта, филологическай наука кандидата Агафья Захарова уһун сыл сыралаһан архыып матырыйаалларынан таһаартарбыт. Научнай редакторынан историческай наука доктора В.Н. Иванов, рецензеннэринэн историческай наука доктора А.А. Борисов, историческай наука кандидата Е.С. Шишигин үлэлээбиттэр.
Тохсунньу 24 күнүгэр буолбут кинигэ сүрэхтэниитин СР правительствотын председателин солбуйааччы Сергей Местников салайан ыытта. Үйэлэри уҥуордаан кэлбит архыып матырыйаалларынан бэчээттэммит кинигэни ырытыыга археограф Александр Калашников, государственнай советник Андрей Борисов, учуонай Андриан Борисов, народнай суруйааччы Николай Лугинов кытыннылар, кинигэ этническэй суолтатын, материальнай, духуобунай сыаннаһын бэлиэтээтилэр.
Политсыылынай Вацлав Серошевскай олорон, сылдьан ааспыт Верхоянскай, Нам, Уус Алдан, Мэҥэ Хаҥалас, Таатта улуустарыттан ыҥырыылаах ыалдьыттар санааларын үллэһиннилэр. Нам улууһуттан улуус баһылыгын солбуйааччы Мария Игнатьева В.Л. Серошевскай Нам улууһун Хатыҥ Арыы нэһилиэгэр 5 сыл олорбут кэмин сырдатта, кини үтүөтүн үйэтитэр үлэлэри билиһиннэрдэ.
Түмүккэ ааптар Агафья Захарова кинигэ улахан көҥүлүнэн тахсыбытын, саха омук олоҕо-дьаһаҕа, култуурата - барыта оччотооҕу кэм кырдьыга буоларын, кинигэ нуучча-географическай общество, СР национальнай архыыбын, П.А. Ойуунускай аатынан литературнай музей өйөбүлүнэн "Алаас''
кинигэ кыһатыгар 500 экземплярынан киэҥ араҥа ааҕааччыларга ананан тахсыбытын дириҥ махталынан иһитиннэрдэ. Кинигэ саха дьонугар хайа баҕар хайысхаҕа тирэх ыйынньык буолуо диэн эрэлин биллэрдэ.
-
0
-
0
-
0
-
0
-
0
-
0
