Улахан кыыс Марианна күстэҕи күөгүлүүр туһугар туспа дьарык буоларын этэр. Тымныыга да кыргыттар мууһу дьөлөр буурдарын, күөгүлэрин, муус ыраастыыр тэриллэрин, олорор олоппосторун туппутунан, Индигирдэригэр киирэллэр. Аны ойбон аллардыҥ да, тутатына хабан барбат. Маныаха кыргыттар хас даҕаны сиргэ кыра луункалары тэһэллэр. Хас эмэ чаас устата бэлэмнэнии үлэтин кэннэ, аны тулуурдаахтык балык хабарын күүтэҕин. “Табыллыбыт күнүгэр аччаабыта 50-тан да тахсаны тутуохха сөп, оттон мэлийдэххинэ, биир да күндү буолар”, -- дииллэр.
Муус аннынан күөгүлээһин кэмэ алтынньы, сэтинньи ыйдартан Саҥа дьылга диэри буолар. Бу кэмҥэ күстэх күүскэ хабар. Оттон бөдөҥ күстэҕи бөһүөлэктэн 30-ча килэмиэтир тэйиэс сытар Үөннээх Таас учаастакка баран хаптараллар. Манна тиэхиньикэтэ суох киһи тиийбэт. Онон кыргыттар аймахтарын кытары бараллар. Балаакка тардынан, ас-үөл астанан, түүннэри олороллор. Дьиктитэ, балык хараҥарыыта үчүгэйдик хабар.
Суруллубатах быраабыла быһыытынан, хаптарбыт балыккын барытын туһаҕа таһаарыахтааххын. Кутурук да быраҕылыннаҕына – аньыы. Күөх Боллох Тойон өһүргэнэн, көмүс хатырыктааҕыттан матара туруон сөп. Онон аҕалбыттарын барытын астыыллар. Туустууллар, ыһаарылыыллар, буруоҕа ыыһаталлар, дьоҥҥо бэрсэллэр.
“Балыктыыр диэн туспа абылаҥ буоллаҕа. Ыраас салгын, чуумпу... Ханнык баҕарар санааттан ыраастаныахха сөп. Уйулҕаҥ хамсаабыт, толкуйга түспүт, санааҕа баттаппыт кэмҥэр күөгүнэн балыктааһын дууһаҕа саамай абыраллаах”, -- диир Маргарита Слепцова.
Бу күстэхтээһин туһунан кэпсээтэххэ. Аны туран, кыһынын муус аннынан сыаҥааны хаптараллар. Маныаха туспа кистэлэҥнэрдээх. Алларыллар ойбоно кэтит буолар, күрүчүөгэ анал үс салаалаах. Хаптарарга тыыннаах күстэх мэҥиэлэнэр. Күстэх кутуругун кыратык сарбыйан баран, ууга уктахха, ордук хабар эбит.
Бу курдук балыксыт ийэ уонна кыргыттар ыраах Абый улууһугар айылҕалыын алтыһан, астарын-үөллэрин булуналлар.
-
4
-
0
-
0
-
0
-
0
-
0
