Чернышевскайдааҕы балык собуота 2025 сылы кэккэ ситиһиилэрдээх түмүктээбит. Өрөспүүбүлүкэ өрүстэригэр, күөллэригэр 32 мөлүйүөн устуука балык үөскэҕин, ол иһигэр Өлүөнэ өрүскэ аан бастаан 20 тыһыынча тууччах, Анаабыр өрүскэ 2 мөлүйүөн чыыр ыамаларын ыыппыт. Собуокка Сибиир хатыыһын уонна чыыры ууһатар ыстаадалар үөскэтиллибиттэр, кэлэр өттүгэр балык атын көрүҥнэригэр үлэ барара былааннанар. Светлайдааҕы водохранилищеҕа табаарынай балыгы ууһатыы үлэтэ былаан быһыытынан баран иһэр.
Балык собуота 2025 сыл бүтүүтүгэр олохтоох балык саҥа көрүҥүн батарыыны саҕалаабыт – 15 туонна форель балыгы атыыга таһаарбыт. Билиҥҥитэ форель сүрүннээн Мирнэй улууһугар батарыллар, аҕыйаҕы амсатыыга диэн Дьокуускайга аҕалбыттар. Бу балыгы ууһатыы технологиятын үчүгэйдик баһылаан истэхтэринэ, бородууксуйа кээмэйэ сыллата эбиллэн иһиэхтээх.
– Чернышевскайдааҕы балыгы ууһатан иитэр собуот Саха Сиригэр балык арааһын харааннааһыҥҥа кылаата улахан. Төһө да уустуктар баалларын үрдүнэн, үчүгэйдик үлэлии турар, көрдөрүүлэрэ куһаҕана суох, – диэтэ Евгений Перфильев.
Бу туһунан Экология, айылҕаны туһаныы уонна ойуур хаһаайыстыбатын министиэристибэтин пресс-киинэ иһитиннэрэр.
Хаартыска: тустаах саайтан.
-
0
-
0
-
0
-
0
-
0
-
0
