СӨ култуураҕа уонна духуобунай сайдыыга миниистирин солбуйааччы Владислав Левочкин, Уус Алдан улууһун култууратын начаалынньыгын солбуйааччы, норуоттар VIII спортивнай оонньууларын култуурунай бырагырааматын пресс-киинин салайааччы Лена Павлова, Оонньуулар сүрүн режиссера, туруорааччы-режиссердар бөлөхтөрүн салайааччы, СӨ Судаарыстыбаннай циркэтин дириэктэрэ Сергей Расторгуев, сүрүн сценарист, Судаарыстыбаннай цирк туруорааччы-режиссера Ольга Расторгуева, Оонньуулар туруорааччы-худуоһунньуга, Судаарыстыбаннай цирк кылаабынай худуоһунньуга Петр Винокуров, Оонньуулар туруорааччы-режиссера Михаил Степанов, Оонньуулар кылаабынай хореограба Алена Павлова тэрээһиҥҥэ кыттыыны ыллылар.
Владислав Левочкин тэрээһин таһыма үрдүгүн этэн туран, култуура бырагырааматын ааспыт уонна буолуохтаах сабыытыйаларын туһунан кэпсээтэ:
--Спартакиаданы бэлэмнээн ыытыыга уонна кыттааччылары, ыалдьыттары көрсүүгэ улахан үлэни оҥордубут. Саха Сирин норуоттарын VIII спортивнай оонньууларын аһар церемониятын көрөөччүлэр чаҕылхайын уонна киэҥ хабааннааҕын бэлиэтииллэр. Күн аайы араас култуурунай тэрээһиннэр ыытыллаллар, ону таһынан Оонньуулары сабыы аһыллыыттан хаалсыбат үчүгэй буолуоҕа.
СӨ норуоттарын оонньууларын култуура тэрээһиннэрэ 7 былаһааккаҕа ыытыллаллар: Сэһэн Ардьакыап аатынан Уус Алданнааҕы устуоруйаны-кыраайы үөрэтэр түмэлгэ, "Олоҥхо дьиэтэ" этнокультурнай кииҥҥэ, Күлүмнүүр аатынан "Тойон Мүрү" култуура дыбарыаһыгар, "Бибилэтиэкэлэр үлэлэһиилэрин эрэгийиэннэр икки ардыларынааҕы Уус Алданнааҕы киинэ" муниципальнай хааһыналаах тэрилтэҕэ, "Майаҕатта Бэрт Хара" стадиоҥҥа, Бороҕон с. култуура уонна сынньалаҥ пааркатыгар, Чараҥ нэһилиэгин "Нэлээн" ипподромугар. Ыалдьыттары уонна спортсменнары Бэйдиҥэ уонна Оҕуруоттаах сэлиэнньэлэригэр киириигэ көрсүбүттэрэ.
2022 сыл от ыйын 4-9 күннэригэр Уус Алдан улууһа 26 сыл буолан баран, Саха Өрөспүүбүлүкэтин норуоттарын VIII спортивнай оонньуулара иккистээн ыытар. САССР 100 сылын чэрчитинэн бырагыраамаҕа 100 тэрээһин киирэр.
-
0
-
0
-
0
-
0
-
0
-
0
