Арассыыйа былааҕа уонна өрөгөй ырыата
Быйылгы Билии күнүгэр оскуолаларга үөрэнээччилэр Арассыыйа Федерациятын былааҕын көтөҕүүттэн уонна Өрөгөй ырыатын толорууттан үөрэх дьылын саҕалыахтара. Саҥа тэрээһин нэдиэлэ ахсын ыытыллыаҕа. Көҕүлээһини дойду Бэрэсидьиэнэ Владимир Путин өйөөбүтэ, оттон РФ Үөрэҕириитин министиэристибэтэ сиэр-туом ыстандаартын оҥорон бигэргэттэ. Оскуолаларга знамя тутааччы уонна знамя бөлөҕө тэриллиэҕэ.
Оскуолаҕа үөрэтии саҥа ньымата
Бастатан туран, оскуола оҕолорун үөрэтиигэ судаарыстыбаннай бэрэбиэркэни ааспыт, анал реестргэ киирбит электроннай ресурсалары эрэ туһаныахха сөп буолар. Ол эрээри, билиҥҥитэ бу испииһэккэ киириэхтээх ресурсалар чуолкайдана иликтэр.
Иккиһинэн, дьиэҕэ олорон үөрэнээччи аккредитацияламматах бырагырааманан үөрэнэр буоллаҕына, бу кэмтэн ыла долгуйбат. РФ Үөрэҕириигэ министиэристибэтэ бигэргэппит саҥа бырагырааматынан туһааннаах аккредитацияны ааспыт оскуолаҕа үөрэнээччи түргэнник эксээмэннэри туттаран, аттестат ылары ситиһиэҕэ. Өссө биир саҥа уларыйыы – 2023 сылга диэри үөрэнээччилэр тус дааннайдара «Мин оскуолам» биир кэлим судаарыстыбаннай систиэмэҕэ киллэриллэр. Бу систиэмэ оҕо оскуолатааҕы электроннай дневнигин, сурунаалын уонна уруок араспысаанньатын холбуур. Маны таһынан оскуола салалтата ханнык баҕарар электроннай кинигэни, ол иһигэр онлайн-куурустары эбии киллэрэр буолуоҕа.
Арктикаҕа чэпчэтиилээх авиабилет
Саха Сиригэр Арктика оройуоннарыгар чэпчэтиилээх авиабилет атыытын сөргүтүөхтэрэ. СӨ Бырабыыталыстыбата, Ил Дархан Айсен Николаев сорудаҕынан, бу сыалга 175 мөл. солк. көрдө. Санаттахха, быйылгыттан бырагыраама усулуобуйата уларыйбыта: субсидия сыл устата көрүллэр, саастарынан хааччахтааһын уһулунна, көрүллэр миэстэнэн квота тоҕуска диэри элбээтэ. Ону сэргэ, субсидиянан Арктика зонатын муниципальнай оройуонугар чахчы регистрацияламмыт эрэ дьон туһаныа.
Аармыйаттан босхолонуу
Күһүҥҥү байыаннай сулууспаҕа ыҥырыы алтынньы 1 күнүттэн саҕаланар. Ол иннинэ, балаҕан ыйыгар, IT-исписэлиистэртэн аармыйаттан босхолонуу туһунан сайабылыанньаны хомуйуу ыытыллар. Сайабылыанньалары үлэ биэрээччи «Госуслуги» портал нөҥүө ыытыахтаах. Ол кэннэ тустаах хамыыһыйа бэрэбиэркэлиир уонна байыаннай сулууспаттан босхолуур туһунан болдьоҕун бигэргэтэр. Үлэ биэрээччи сайабылыанньалары хойутаппат туһуттан, иһитиннэриилэри порталга кэмигэр кэтээн көрүөхтээх.
Хамсаабат баай-дуол регистрацията
Росреестр биир киһиэхэ өлүүлээн тиксэр 6 кв.м — кыра иэннээх олорор дьиэ регистрациятын ыытары тохтотор. Ол курдук, олорор дьиэ (кыбартыыра, чааһынай дьиэ) өлүүлээһинин биир киһиэхэ кээмэйэ 6 кв. м итэҕэһэ суох буолуохтаах. Уратыта – нэһилиэстибэнэн тиксибит, ийэ хапытаалынан атыылаһыллыбыт , приватизацияланар дьиэлэргэ бу ирдэбил тарҕаммат. Иккиһинэн, РФ Гражданскай Кодексатыгар киирэр уларыйыыларынан, киһи олорбот тутууларын сыыһа туттар түгэнигэр судаарыстыба былдьыыр кыахтанар. Холобур, гарааһы шиномонтаж, автомойка өҥөтүн оҥорор сыалга туһанар түгэнигэр, судаарыстыба күһэлэҥ дьаһалынан былдьыыр бырааптаах.
Тырааныспарга электроннай докумуон
Тырааныспарынан таһаҕас тиэйии, таһыы хайысхатыгар электроннай докумуон эргиирин саҥа көрүҥэ үлэҕэ киириэҕэ. Тырааныыспар накладнойун, нэрээт бирикээһин, биэдэмэһи оҥоруу электроннай ньымата үлэлиэҕэ. РФ Тырааныспарга министиэристибэтин быһаарыытынан, электроннай биитэр кумааҕы көрүҥүнэн докумуон эргиирин ньыматын тырааныспар хампаанньата бэйэтэ талар кыахтаах.
Киһи тус дааннайдарын туһаныы
«Тус дааннайдар тустарынан» сокуоҥҥа уларыйыылар киирэллэр. Үлэ биэрээччи тэрилтэлэр Роскомнадзорга хас биирдии киһи тус дааннайдарын туһаналларын туһунан иһитиннэриини булгуччу тиксэрэр эбээһинэстэнэллэр. Бу дааннайдарга киирэллэр: үлэһиттэр , биирдиилээн дьон, тэрилтэҕэ киирэргэ пропуск ылааччылар ааттара, араспаанньалара. Ирдэбил быһыытынан, Роскомнадзорга иһитиннэриилэр электроннай көрүҥүнэн биитэр кумааҕы докумуонунан ыытыллаллар.
Үлэ харыстабылыгар үөрэтии
Балаҕан ыйыттан РФ Бырабыыталыстыбатын уурааҕынан үлэ харыстабылыгар үөрэтиигэ, билиилэрин бэрэбиэркэлээһиҥҥэ саҥа бэрээдэк үлэҕэ киириэҕэ. Холобур, үлэ харыстабылын үөрэтээһинин ыытыы биэс көрүҥнээх – үлэ биэрээччигэ, атын сыһыана суох тэрилтэҕэ, бастакы көмөнү оҥорууга, стажировка кэмигэр уонна инструктаж бэрээдэгинэн үөрэтии. Маны таһынан, инструктаж ыытыы үс ньымалаах – «первичнэй», үлэ миэстэтигэр уонна тус сыаллаах үөрэтии. Үлэһит дуоһунаһын биир тэрилтэ иһигэр уларыппат түгэнигэр, уочарата суох үлэ харыстыбылыгар булгуччулаах үөрэнииттэн босхолонор.
«Госуслуги» порталга саҥа сервис
Үлэ Кодексатыгар олоҕуран, каадыр докумуонун эргииригэр саҥа көрүҥ киирэр. Балаҕан ыйыттан «Госуслуги» портал нөҥүө үлэ биэрээччи уонна үлэһит икки ардыларыгар докумуоннары атастаһыыга саҥа электроннай сервис үлэлиэҕэ. Портал тэхиниичэскэй кыаҕын барытын хааччыйыа. Электроннай докумуон эргииригэр көһөр туһунан быһаарыыны тэрилтэ салалтата ылынар.
Булгуччулаах психиатрическай кэтээн көрүү
Аны күһүҥҥүттэн үлэһит психиатрическай кэтээһини булгуччу ааһара ирдэниллэр. РФ Доруобуйаҕа харыстабылын министиэристэбэтин быһаарыытынан, үлэһит психиатрическай туоһулааһыны үлэ биэрээччи бирикээһинэн, булгуччу ааһыахтаах. Холобур, мед-көрүү кэмигэр үлэһит майгытыгар быраас туох эмэ үлэҕэ сөбө суоҕу булан туоһулаатаҕына.
Туристыыр кэшбек
Дойдуга балаҕан ыйыгар туристыыр кэшбек бырагыраамата үлэлиир. Усулуобуйата – сынньана көтөөччү төлөбүрүн 20% толуйар, ол эрэн суумата 20 тыһ. солк. куоһарбат. Сынньана барааччы болдьоҕо алтынньы ый 1 күнүттэн, оттон круизка - балаҕан ыйын 1 күнүттэн саҕаланар. Сүрүн ирдэбилэ – сынньана барааччы путевката «МИР» картанан төлөнөр, болдьоҕо ахсынньы 25 күнүгэр диэри түмүктэниэхтээх. Сиһилии мирпутешествий.ру саайка киирэн билсиҥ.
Үүт ас бородууксуйатын маркировката
«Честный ЗНАК» сервис нөҥүө үүт уонна үүт ас бородууксуйатын маркировкалааһын саҥа түһүмэҕэ саҕаланар. Булгуччулаах маркировкалааһын сыала — нолуогу үрдэтии уонна ырыынакка сымыйа үүт бородууксуйатыттан босхолонуу. Усулуобуйата – оҥорон таһаарааччы биитэр эргинээччи тэрилтэ «Честный ЗНАК» сервискэ регистрацияны ааһар, Data Matrix сыыппара кодтарын ылар уонна табаарга сыһыарар. 40 хонукка харайыллар үүт бородууксуйатын кууһунан уонна биирдиилээн атыылыыр тэрилтэлэр хас биирдии атыыламмыт табаар туһунан сибидиэнньэлэри булгуччу ыытар эбээһинэстэнэллэр.
IT-исписэлиистэргэ дистанционнай үөрэхтээһин
«Университет-2035» платформаҕа IT-исписэлиистэргэ дистанционнай үөрэхтээһин куурустара саҕаланаллар. IT- эйгэҕэ үлэлиир исписэлиистэр квалификацияларын талбыт идэлэригэр үрдэтиэхтэрин сөп. Санатар буоллахха, тас дойдулартан Арассыыйаҕа кэлэр IT-исписэлиистэргэ олохсуйа хаалалларыгар чэпчэтиллибит бэрээдэгинэн көҥүл бэриллэр.
Интэриниэккэ реклама
Интэриниэт нөҥүө барар реклама хайысхатыгар уларыйыылар киирэллэр. Реклама биэрээччи туһунан сибидиэнньэ уонна реклама буоларын туоһулуур маркировка булгуччу суруллуохтаах. Социальнай ситимнэргэ, блогтарга тахсыбыт уонна тахсар рекламалар сэтинньи 1 күнүгэр диэри булгуччу ыйыллыбыт ирдэбиллэргэ эппиэттиир буолуохтаахтар. Салгыы сэтинньи ыйтан ирдэбили кэһээччи административнай ыстараапка тардыллар.
Социальнай көмө
Социальнай көмө саҥа миэрэлэрин ыспыраапката суох, автоматическай эрэсииминэн аныахтара. Анал төлөбүрү сайабалыанньата суох ылар кыах үөскүүр. РФ Үлэҕэ миинистиэристибэтин бэрэстэбиитэллэрэ иһитиннэрэллэринэн, федеральнай, өрөспүүбүлүкэтээҕи уонна муниципальнай социальнай төлөбүрдэр уонна босуобуйалар 2024 сылга диэри сайабылыанньата суох ааҕыллар буолуохтара.
- 2
- 1
- 0
- 0
- 0
- 0