Общество

Санатан этэр буоллахха, дойдубут бэрэсидьиэнэ Владимир Путин ыйааҕынан, алтынньы 2 күнэ производственнай үөрэх педагогтарын уонна маастардарын, маны тэҥэ бу эйгэ үлэһиттэрин идэлээх бырааһынньыктарынан  биллэриллибитэ. 

Тэрээһиҥҥэ бырабыыталыстыба бэрэссэдээтэлин солбуйааччы Сергей Местников кыттыыны ылла. Эҕэрдэ тылыгар бэлиэтээбитинэн, эрэгийиэн бырабыыталыстыбата орто анал үөрэхтээһин сайдыытыгар улахан болҕомтотун уурар. Бүгүҥҥү күҥҥэ Саха Сиригэр орто анал үөрэҕи биэрэр 42 тэрилтэ баар. Манна 25 тыһыынча кэриҥэ устудьуон үөрэнэр. Каадырдары 205 араас идэҕэ уонна специальноска бэлэмнииллэр.

“Үөрэҕирии” национальнай бырайыак чэрчитинэн үөрэх тэрилтэлэрин матырыйаалынай-тэхэниичэскэй баазаларын саҥардыы тиһигин быспакка ыытыллар. Быйыл Саха Сирэ 200 мөл. солкуобайтан тахса суумалаах федеральнай граны ылбыт. Вице-премьер бэлиэтээбитинэн, орто анал үөрэх тэрилтэлэригэр  саҥардыы үлэтэ инникитин салҕанан барыа.

Видеонан эҕэрдэтин Арассыыйа Федерациятын үөрэҕириитин миниистирэ Сергей Кравцов ыытта.

“Бүгүн дойду үрдүнэн аныгы үөрэх кииннэрэ тэриллэллэр, исписэлиистэри бэлэмнээһин бырагыраамалара чочуйуллаллар. Быйыл колледжтарга араас аныгы тэриллэринэн толору хааччыллыбыт 900 саҥа мастарыскыай аһыллыахтаах. Үөрэх процеһыгар кэскиллээх салаа үлэһиттэрэ бүтэрээччилэри үлэ миэстэтинэн хааччыйыыга көхтөөхтүк кытталлар.  Ол,  бастатан туран, эдэр дьон билиҥҥи олоххо ирдэнэр идэни баһылаабыттарын бигэргэтэр, ылбыт сатабыллара туһалааҕын туоһулуур. Уонна, саамай сүрүнэ, кинилэр дойдубут бырамыысыланнаһа сайдарыгар төһүү күүс буолуохтаахтар. Арассыыйа экэниэмикэтигэр кылааттарын киллэриэхтэрэ», — диэтэ  федеральнай миниистир.

Идэлээх бырааһынньыгынан мустубуттары  Ил Түмэн бэрэссэдээтэлин солбуйааччы Антонина Григорьева, М.К.Аммосов аатынан Хотугулуу-Илиҥҥи федеральнай университет ректора Анатолий Николаев эҕэрдэлээтилэр.

Саха Сирин үөрэҕириитин уонна билимин миниистирэ Ирина Любимова иһитиннэрбитинэн, бүтэһик сылларга орто анал үөрэхтээһин биллэ үрдүк таһымҥа тахсыбыт. Саха Сиригэр сылын ахсын 6 тыһыынчаттан тахса устудьуон орто анал идэлээх исписэлиис аатын ылар. Ааспыт сыл көрдөрүүтүнэн, бүтэрбиттэр 42%-нара идэлэринэн үлэ булбуттар. Үксэ бырамыысыланнай тэрилтэлэргэ.

Өрөспүүбүлүкэбитигэр идэлэрин толору баһылаабыт исписэлиистэри бэлэмнээн таһаарарга усулуобуйа тэриллэр. Үөрэх тэрилтэлэрэ аныгы ирдэбиллэргэ эппиэттиир малынан-салынан, тиэхиньикэнэн хааччыллаллар. Ол курдук, “Үөрэҕирии” национальнай бырайыак көмөтүнэн 2020 сылтан 43 саҥа мастарыскыай 9 анал үөрэх тэрилтэтигэр аһыллыбыт. Олор араас хайысханы хабаллар: тэхэниичэскэй идэлэри, өҥө оҥоруу эйгэтин, IT-салааны, тырааныспары уонна логистиканы. Бу дьыл бүтүөр диэри өссө эбии 12 мастарыскыай үлэҕэ киириэ. Оттон 2023 сылга сэттэ колледжка уонна техникумҥа 15 мастарыскыай баар буолара былааннанар.

Саха Сирэ Уһук Илин уокурук үрдүнэн аан маҥнайгынан кэлэр кэм идэлэригэр бэлэмниир киини арыйбыта. Манна номнуо тыһыынчанан киһи үөрэннэ. Маны сэргэ, эрэгийиэҥҥэ араас бырайыактар олоххо киирэллэр. Ол иһигэр идэ маастарыстыбатын быһаарар «Эдэр профессионаллар» чемпионат, инбэлииттэргэ уонна доруобуйаларыгар хааччахтаахтарга «Абилимпикс» куонкурус, оскуола үөрэнээччилэригэр профориентационнай хабааннаах «Билет в будущее» бырайыак.

Үөрүүлээх тэрээһиҥҥэ судаарыстыбаннай уонна биэдэмистибэ наҕараадаларын орто анал үөрэхтээһин үлэһиттэригэр уонна бэтэрээннэригэр дохсун ытыс тыаһынан туттардылар.

«PROфи СПО» аан маҥнайгытын ыытыллыбыт өрөспүүбүлүкэ таһымнаах күрэхтэһии кыайыылаахтара, «Эдэр профессионаллар» национальнай чемпионат призердара ааттаннылар. Маны сэргэ орто анал үөрэхтээһин бэтэрээннэригэр туһуламмыт «Верность. Преданность. Призвание» кинигэни сүрэхтээтилэр.