Биһиги быйылгы лауреттары кытары үөрүүлэрин тэҥҥэ үллэстэ таарыйа кыратык билистибит.
Надежда Иванова, Бүлүү улууһун “Култуура сайдыытын уонна норуот айымньытын оройуоннааҕы киинин” методиһа:
– Мин култуура салаатыгар үлэлээбитим быйыл номнуо 50 сылым. Бу кэм устата методистаабытым, уус-уран салайааччылаабытым, начаалынньыктаабытым, дириэктэрдээбитим. Кэми – кэрдииһи анааран көрдөххө, аныгы кэмҥэ култуураҕа араас бырагыраама элбэх. Бырайыактары оҥорон эбии дохуот киллэриниэххэ сөп. Холобур, биһиги улууспутугар национальнай бырайыагынан икки саҥа култуура дьиэтэ тутулунна, муусука оскуолатыгар үнүстүрүмүөннэр ылылыннылар. Бэйэбит тэрилтэбитигэр Камаз баазатыгар оҥоһуллубут “Автоклуб” ылбыппыт. Нэһилиэктэргэ сылдьарга олус табыгастаах. Хас биирдии бырайыакпытын улуус дьаһалтата, баһылыкпыт Сергей Николаевич Винокуров өйүүрүгэр түгэнинэн туһанан, махтанабыт.
Араас саҥа сүүрээннэри киллэрэбит. Саха бастакы идэтийбит композитора Марк Жирков төрөөбүтэ 130 сылын чэрчитинэн, кини “Сыгый Кырынаастыыр” оператын улахан сыанаҕа таһаарбыппыт. Бу туруорууга элбэх олохтоох дьон кыттыбыта.
Ону таһынан, үрдүк үөрэх кыһаларын икки ардыларыгар биир дойдулаахпыт Марк Жирков аатынан уонна иккитэ норуоттар икки ардыларынааҕы таһымнаах күрэхтэри ыыттыбыт. Маныаха Марк Николаевич үөрэммит консерваториятын кытары ыкса үлэлиибит.
Марк Жирков айымньыларын түмэр 10 туомнаах хомуурунньук оҥоро сылдьабыт, сотору алтыс кинигэ күн сирин көрүө. Маннык гынан, 135 сылын көрсөр үбүлүөйдэх сылбытыгар хомуурунньук бэлэм буолуохтаах.
Быйыл, кулун тутар 28 күнүгэр, бастакы өрөспүүбүлүкэтээҕи “Бастыҥ култуура эйгэтигэр настаабынньык” диэн күрэх тэрийбиппит. Түөрт улуустан настаабынньыктар иитэн-үөрэтэн таһаарбыт, такайбыт ыччаттарыныын кыттыбыттара. Бу кэннэ, икки хонугунан дойдубут Бэрэсидьиэнэ Настаабынньык күнүн бигэргэтэр туһунан уураахха илии баттаабыта. Бырааһынньыгы эһиилгиттэн кулун тутар 2 күнүгэр бэлиэтиир буолуохпут. Маныаха маҥнайгы хардыы оҥорбут курдук сананабыт.
Бириэмийэ ылбыппыттан олус үөрдүм, долгуйдум. Ханнык баҕарар идэ таптаан, умсугуйан дьарыктаннахха, бэриниилээх буоллахха киһини кынаттыыр, киэҥ аартыктыыр.
-
1
-
0
-
0
-
0
-
0
-
0
